- Dosjan Jumaqan (60 kg) ózbekstandyq Bobomýrod Boımırzaevty yǵystyrdy. 70 kg salmaqta Bıbarys Áshirbaı Iordanııa boksshysy Anas Absoýldy 2-raýndta jeńdi. Danııal Shalqarbaı da (65 kg) kanadalyq Sonnı Meredıdi nokaýtpen utty. Asa aýyr salmaqta aıqasqan Vladıslav Samojonov jańazelandııalyq Tı Anı Rekıtti 2-raýndta tehnıkalyq nokaýtpen jeńip, jartylaı fınalǵa shyqty. Al Edige Nurqoja (55 kg) Túrikmenstan boksshysy Abdýrasýl Arslanovqa ese jiberdi.
- Búgin Kanadanyń Monreal qalasynda short-trekten álem chempıonaty túńligin túredi. El namysyn Denıs Nıkısha, Abzal Ájiǵalıev, Ádil Ǵalıahmetov, Nurtilek Qajyǵalı, Aıbek Násen, Iаna Han, Malıka Ermek, Alına Ájiǵalıeva, Olga Tıhonovalar qorǵaıdy.
- Estonııanyń Otepıa qalasynda bıatlonnan álem kýboginiń kezeńi bastaldy. Vladıslav Kıreev, Áset Dúısenov, Vadım Kýrales, Aleksandr Mýhın erler básekesinde, Aısha Raqysheva, Darıa Klımına, Laýra Qıynbaeva, Mılana Geneva áıelder dodasynda synǵa túsedi. Jarys 15 naýryzda márege jetedi.
- Konkıshi Evgenıı Koshkın Nıderlandta ótken «Kúmis shar» halyqaralyq týrnırinde jeńiske jetti. Ol 100 metr qashyqtyqty 9,56 sekýndta júıtkip ótip, qarsylastaryn shań qaptyrdy. Kúmis, qola júldeler nıderlandtyq Stefan Festenbýrg pen Mas van De Bosqa buıyrdy. E.Koshkın bıylǵy aqpanda Italııada ótken qysqy Olımpıada dodasynda 500 metrge júgirýde 10-orynǵa turaqtaǵan edi.
- Tarazda grek-rım, erkin jáne áıelder kúresinen U15, U23 jas sanattary arasyndaǵy el chempıonaty bastaldy. Bıylǵy dúbirli dodaǵa barlyq óńirden 1000-nan astam balýan jınalyp, «Taraz-Arena» sport kesheninde jarys kórigin qyzdyrady. Jasóspirimder men jastar arasyndaǵy tartysta top jarǵan, júlde alǵan balýandar qurama sapyna qabyldanyp, Azııa men álem chempıonattaryna qatysý múmkindigine ıe bolady.
- Bıylǵy el chempıonatynda jas balýandarǵa aqshalaı syıaqylar qarastyrylǵan. U15 jas sanatynda ár salmaq dárejesinde chempıon atanǵan balýanǵa 200 myń, kúmis júldegerge 100 myń, qola júldegerlerge 50 myń teńgeden, U23 sanatynda el chempıonyna 500 myń, ekinshi oryn ıegerine 300 myń, úshinshi oryn alǵan balýandarǵa 150 myń teńgeden syıaqy beriledi. Sonymen qatar arnaıy taǵaıyndalǵan «Qaısar rýh», «Dara tásil» atalymdarymen marapattalǵan balýandarǵa 150 myń teńge kóleminde syıaqy tabystalady.
