Foto: astanatv.kz
Qaldyqtardyń kóp bóligi demalys jáne mereke kúnderinen keıin jınalady. Kól muzynda jáne jaǵalaý aımaqtarynda plastık bótelkeler, paketter, azyq-túlik qaptamalary, bir rettik ydystar jáne basqa da turmystyq qaldyqtar qalady. Kóktemde muz erigen kezde bul qaldyqtar sýǵa túsip, kólderdiń ekojúıesine zııan keltirýi múmkin.
Inspektorlar tek sý aıdyndarymen shektelmeıdi. Ulttyq park aýmaǵyndaǵy orman alqaptary men týrıstik soqpaqtardy tazartý jumystary turaqty túrde júrgiziledi, bul sharalar tabıǵı aýmaqtardyń tazalyǵyn saqtaý jáne qorshaǵan ortaǵa uqypty qaraý mádenıetin qalyptastyrýǵa baǵyttalǵan «Taza Qazaqstan» aksııasynyń bir bóligi bolyp tabylady.
Qorshaǵan ortany qorǵaý sharalarymen qatar, ulttyq park tabıǵatty qorǵaý zańnamasyn buzǵandar úshin ákimshilik jaýapkershilik bar ekenin eskertedi. Qys mezgilinde «Erekshe qorǵalatyn tabıǵı aýmaqtardyń qorǵaý rejımin buzý» baby boıynsha 34 derek tirkelip, árqaısysyna 10 AEK kóleminde aıyppul salyndy. Sondaı-aq bir kelýshi «Ormandy qaldyqtarmen búldirý, lastaý nemese orman qory jerlerine ózge de zııan keltirý» baby boıynsha 20 AEK aıyppul tóledi.
Ulttyq park ákimshiligi Býrabaı tabıǵatyn saqtaý tek ınspektorlardyń jumysyna ǵana emes, kelýshilerdiń jaýapkershiligine de baılanysty ekenin eske salady. Kelýshilerge qarapaıym erejelerdi saqtaý usynylady – qoqysty ózimen birge alyp ketý jáne qorshaǵan ortaǵa uqypty qaraý.
«Aldaǵy ýaqytta da «Taza Qazaqstan» aksııasy jalǵasady, al ınspektorlar aýmaqty tazartý sharalaryn júıeli túrde ótkizedi. Mysaly, 2026 jylǵy 21 naýryzda «Býrabaı» MUTP aýmaǵyndaǵy barlyq kólderde «Taza muz» ekologııalyq aksııasy josparlanyp otyr. Oǵan kez kelgen nıet bildirýshi qatysa alady. Eriktiler Býrabaı kenti, Kenesary kóshesi 47 «B» mekenjaıy nemese 8 (71636) 71236 telefony arqyly habarlasa alady», delingen Ulttyq park ákimshiliginiń habarlamasynda.
