Resmı aqparattan bilgenimiz, jabyndysy búlingen ǵımarat «Saryarqa» aýdanyna qarasty «Aıka» turǵyn úı kesheni eken. Oqıǵa 11 naýryz kúni saǵat 17:00 shamasynda oryn alǵan. Ǵımarattyń jylý oqshaýlaǵysh qabatynyń bir bóligi túsip qalǵan. Beınejazbadaǵy kadrdan úıdiń bir búıiri ashylyp, qaldyqtary salbyrap ilinip turǵany baıqalady. Onyń buzylǵan bólikteri ǵımarattyń janyna, jylý oqshaýlaǵysh plıtalar úıdiń aýlasyna qulaǵan. Mundaıda jóndeýge ketetin qarajat, shyǵynnan buryn qaýipsizdik jaıy qatty alańdatady. Úı 2015 jyly salynǵan. Qurylysqa «Almatyqalaqurylys» kompanııasy jaýapty bolǵan.
Qala ákimdiginiń habarlaýynsha, qazir turǵyn úı keshenin basqaratyn kompanııa jóndeý jumysynyń qunyn eseptep, búlingen jerdi qalpyna keltirýge ónerkásiptik alpınıst tartý máselesin qarastyryp jatyr. «Turǵyn úı qatynastary týraly» zańnyń 34-babyna sáıkes, páter ıeleri kondomınıýmǵa tıesili ortaq múlikti kútip-ustaý mindetin ózderi kóteredi. Zańnyń 2-babynyń 2-tarmaǵyna sáıkes, mundaı ortaq múlikke ǵımarat qasbeti, kireberister, vestıbıýlder, holdar, dálizder, baspaldaqtar men alańdar, lıftiler, shatyrlar, kireberis toptarynyń qalqalary, shatyr asty, tehnıkalyq qabattar, jertóleler, sondaı-aq úıge ortaq ınjenerlik júıeler men jabdyqtar jatady», dep jazylǵan Astana qalasy ákimdiginiń baspasóz qyzmeti usynǵan aqparatta.
Aıtsa aıtqandaı, turǵyn úı keshenin basqaratyn kompanııa jedel iske kirisip, jóndeý jumystaryna ketetin shyǵyndy shamamen eseptep qoıypty.
– Oqys oqıǵadan soń biz óz tarapymyzdan birden tóńirekti qyzyl jippen qorshap, turǵyndarǵa saq júrý keregin eskerttik. Úıdiń syrtqy jabyndysyn jóndeý quzyrymyzǵa kirmeıdi. Tek úı mańynan kúl-qoqys shyǵaryp, tazalaýǵa, santehnıkalyq, elektrıktik jumystarǵa ǵana jaýap beremiz. Shaǵymymyzdy «Almatyqalaqurylys» kompanııasyna joldaǵan edik, biraq olar kepildik merzimi ótkenin jeleý etip, jóndeýden bas tartyp otyr. 2020 jyly atalǵan turǵyn úıge irgeles taǵy bir úıdiń búıiri túsip, turǵyndar óz qarajatyna sylaǵan edi. Qazir de týra sondaı jaǵdaı qaıtalanyp otyr. Demek, keleńsizdiktiń birden-bir sebebi – qurylys kompanııasynyń sapasyz jumysy, – deıdi «MSS-Servise» seriktestiginiń basshysy Alma Salyqova.
Turǵyn úıge jaýapty kompanııa alpınıst shaqyryp, jóndeýge ketetin aqshany eseptegen eken, 3 mln teńgeniń shamasynda shyǵypty. Úıdiń turǵyny Galına Logvınenko 45 páterli úı turǵyndarynyń ol aqshany birden túgel jınaýǵa múmkindigi joq ekenin aıtady.
– Turǵyn úıdiń jylý oqshaýlaǵysh plıtalary ushqan soń, sol irgedegi úılerdiń ishi sýı bastady. Onda turatyn kópbalaly otbasylarǵa, egde jastaǵy kisilerge qıyn. Ol azdaı, kóktemde jaýyn bastalsa, irgedegi úıler syz tartady. Sondyqtan jóndeý jumystaryn erte bastamasaq, saldary aýyr bolýy múmkin. Qazir qala ákimdiginen turǵyn úı jóndeý baǵdarlamalaryna qatysýǵa suranyp otyrmyz, – deıdi G.Logvınenko.
Byltyr qarashada Astanadaǵy kóppáterli úılerdiń biriniń qasbeti sógilip, birneshe adam zardap shekken edi. Olardyń arasynda 23 jastaǵy feldsher Uldana Myrzýan apatty jaǵdaıǵa qaramastan, zardap shekkenderge alǵashqy kómek kórsetip jatqan sátte aýyr jaraqat alyp, baqılyq boldy. Oqıǵa túgel zerttelip, jaýaptylar jazaǵa tartylǵanymen, adamnyń ornyn eshkim toltyra almaıdy. Jalpy, qurylys barysynda óndiristik jaraqat alyp, sońy qaıǵyly aıaqtalǵan oqıǵalar jıi kezdesedi. Qurylysshylar qaýymdastyǵynyń prezıdenti Vıktor Mıkrıýkov:
– «Aıka» turǵyn úı keshenine qatysty tehnıkalyq tekseris júrgizgen jón. Iаǵnı úıdiń búıiri naqty neden búlingenin anyqtap alý qajet. Eger onyń sebebi qurylys barysynda eskermegen shamadan tys, doly jeldiń saldarynan bolsa, oǵan jergilikti ákimdik aralasýǵa tıis. Al barlyq másele jobalaý kezindegi qatelikterden nemese qurylys sapasynan bolsa, onda suraqty jobalaýshy-larǵa, qurylys kompanııasyna qoıǵan durys. Úıdiń qasbetine kepildik merzimi buǵan deıin 2 jyl edi, jańa Qurylys kodeksi aıasynda 10 jylǵa deıin uzartylmaqshy. Qabyldanyp jatqan ózgeristerdiń nátıjesi naqty qalaı bolaryn ýaqyt kórsetedi, – deıdi.
Bir sózben aıtqanda, jańa Qurylys kodeksindegi ózgerister saladaǵy biraz olqylyqty retteıdi degen úmit basym. Qurylys barysy josparlanǵan sátten qatań baqylaýda bolsa, qaýipsizdik kúsheıse, olqylyqqa jol bergen kompanııalarǵa der kezinde shara qoldanylsa oqys oqıǵalar týyndamas edi.
