foto: Aqorda
Qasym-Jomart Toqaev Qazaqstanda júzege asqan konstıtýsııalyq reformanyń tarıhı mańyzyn atap ótip, jalpyhalyqtyq referendým nátıjesinde el qoldaýyna ıe bolǵan Halyq Konstıtýsııasy qabyldanǵanyn aıtty.
«Qazir Qazaqstanda túbegeıli ózgerister kezeńi bastaldy. Ony barshańyz jaqsy bilesizder. Bárimiz bir el bolyp Konstıtýsııalyq reformany tabysty júzege asyrdyq. Bul reformanyń tarıhı mán-maǵynasy erekshe. Onyń el damýyna tıgizetin yqpaly asa kúshti bolaryna kúmán joq. Soǵan baılanysty shet elderdiń basshylary, saıasatkerler jáne sarapshylar bizdiń Konstıtýsııalyq reformaǵa asa zor yqylaspen qarap otyrdy. Olar Qazaqstan konstıtýsııalyq reformaǵa jańasha kózqaraspen qarap, keń aýqymdy ózgerister jasaǵanyn, elimiz Konstıtýsııanyń mán-mazmunyn ózgertip, múlde jańa turpatty el bolǵanyn aıtyp jatyr», dedi Prezıdent.
El Prezıdentiniń aıtýynsha, jalpyhalyqtyq referendýmda azamattarymyz elimizdiń jarqyn bolashaǵy úshin, ıaǵnı, jas urpaqtarymyz úshin tarıhı tańdaýyn jasady. El qoldaýyna ıe bolǵan naǵyz Halyq Konstıtýsııasy tuǵyryna qondy.
Memleket basshysy el azamattaryn Naýryz meıramymen quttyqtady
«Konstıtýsııa – memleketimizdiń bolashaǵyna baǵdar bolatyn, ulttyq maqsat-muratymyzdy aıqyndaıtyn asa mańyzdy qujat, temirqazyq. Muny da aqıqat retinde búkil dúnıe júzindegi qaýymdastyq moıyndap jatyr», dedi Q.Toqaev.
