Keleli kezdesý Dına Nurpeıisovanyń ómiri men shyǵarmashylyǵyna arnalǵan beınerolıkpen bastaldy. Avtor Aıtolqyn Toqtaǵan eńbektiń mazmuny men ǵylymı jańalyǵyna qysqasha toqtalyp ótti. Jıynǵa fılosofııa doktory Darhan Qojabaı moderatorlyq etti. Qatysýshylar monografııanyń ǵylymı mańyzyn aıtyp, qazirgi kúı ónerin zertteýdegi ózekti máseleler tóńireginde oı-pikirlerin bildirdi.
«Kúı ana» qoǵamdyq qorynyń basshysy, Dına Nurpeıisovanyń shóberesi Tólegen Qýanyshev monografııanyń tulǵa taný máselesi úshin asa qundy eńbek ekenin atap ótti. Onyń aıtýynsha, kúıshi Dınanyń ómiri men shyǵarmashylyǵyn ashqan buryn sońdy akademııalyq ǵylymı júıeli kitap bolǵan emes. «Dına Nurpeıisovanyń shyǵarmashylyq joly» degen birinshi bólimde kúıshiniń ómir joly kezeń-kezeńimen taldanǵan. Narynqumdaǵy balalyq shaǵy, shyqqan tegi, boıjetken kezeńi, Astrahan óńirindegi ómiri, keıingi Almatydaǵy shyǵarmashylyq belesteri, Jambylmen kezdesýi, ómiriniń sońǵy jyldary keńinen qamtylǵan.
«Ekinshi bólim – «Dınanyń oryndaýshylyq sheberligi». Bul bólimde kúı óneriniń ishki fılosofııasy, oryndaýshylyq ereksheligi tereń taldanady. Avtor Qurmanǵazy kúıleriniń ınterpretasııasyna toqtala otyryp, Dınanyń oryndaý mánerindegi ımprovızasııanyń basymdyǵyn kórsetedi. Bul bizge mańyzdy bir tujyrym beredi: kúı tek notalyq dáldikpen shektelmeıdi, ol – mazmunǵa saı týyndaıtyn shyǵarmashylyq, ımprovızasııalyq úderis. Árıne, akademııalyq oryndaý qajet, biraq tyńdaýshynyń tanym deńgeıi men rýhanı qabyldaýyna qaraı kúıdiń erkin órisi de saqtalýǵa tıis. Úshinshi bólim – «Dástúr jalǵastyǵy men jańashyldyǵy». Munda avtor salystyrmaly taldaý arqyly Dına men basqa kompozıtorlardyń attas kúılerin zerdeleıdi. Mysaly, «Baıjuma», «Bulbul», «Jiger», «Qosalqa», «Bozsholaq» jáne «Jańa bozsholaq» kúıleri arqyly dástúr men jańashyldyqtyń sabaqtastyǵy aıqyn kórsetilgen», dedi T.Qýanyshev.
Sonymen qatar eńbekte Dınanyń zamanyna saı taqyryptarǵa, ıaǵnı áıel beınesi, soǵys kezeńi, memlekettik merekelerge arnalǵan kúılerine de erekshe mán berilgen. Bul kúı óneriniń tek estetıkalyq emes, áleýmettik-ıdeologııalyq qyzmet atqarǵanyn kórsetedi. Kúıshiniń oryndaýshylyq jáne kompozıtorlyq sheberligi mýzykalyq salystyrmaly taldaý arqyly ashylǵan. Kitap dombyrashy-oryndaýshy, mýzyka zertteýshi mamandarǵa, sol sııaqty jalpy ónersúıer qaýymǵa arnalǵan.
