Talantty kompozıtordyń esimi elimizge ǵana emes, shet memleketterge de jaqsy tanys. Onyń mýzykasynda ulttyq pen zamanaýı naqysh ádemi úılesim tapqan. Búginge deıin daryndy óner ıesi qanshama sımfonııalyq, kameralyq jáne horǵa arnalǵan tamasha týyndy jazdy. Halyq aspaptaryna arnalǵan birneshe kúıi de bar. Sondaı-aq onyń shyǵarmalary «Otyrardyń kúıreýi», «Qosh, Gúlsary», «Balalyq shaǵymnyń aspany», «Shal» sekildi fılmderde paıdalanylǵan.
Byltyr AQSh-ta «Global Music Partnership Press» baspasy kompozıtordyń jeke skrıpka men ishekti
ansamblge arnalǵan «Qarakemer» kúıin jaryqqa shyǵardy. Osylaısha, kompozıtor shyǵarmasy amerıkalyq baspada basylǵan elimizdiń alǵashqy ókili atandy. Bul onyń ómirindegi halyqaralyq deńgeıde tanylýyndaǵy mańyzdy kezeńge aınaldy. Sonymen qatar «Qarakemer» kúıi Qazaqstannyń Nıý-Iorktegi Bas konsýldyǵynyń qoldaýymen Nıý-Iork qoǵamdyq kitaphanasynyń qoryna engizildi. Týyndynyń premerasy Garvard ýnıversıtetinde, Bostondaǵy Beıneleý óneri mýzeıinde ótti.
Bas shaharda dúrkirep ótken kesh – Qýat Shildebaevtyń alǵashqy shyǵarmashylyq keshi. Konsertke halyq kóp jınaldy. Kompozıtor shyǵarmalary «Saz&Soul» toby men «Astana» estradalyq-sımfonııalyq orkestriniń súıemeldeýimen oryndaldy. Baǵdarlama aıasynda kesh ıesiniń «Qaıran kóńil», «Saǵym dúnıe», «Otan Ana», «Jan Ana», «Keshir meni», «Amanat», «Aıalaǵan arman-aı», «Sáýle» ánderi jáne tanymal kınofılmderden alynǵan mýzykalyq týyndylary tyńdarmandy tánti etti. Ony Qazaqstannyń eńbek sińirgen qaıratkerleri Ardaq Balajanova, Renat Ǵaısın, Dılnaz Ahmadıeva, Dáýren Serǵazın, Janar Doǵalova, «Eren eńbegi úshin» medaliniń ıegeri Anna Ývarova, talantty ánshiler Qaırat Baekenov, Marsel, Shaba Ádenqulqyzy, daryndy qobyzshy Oljas Qurmanbek, respýblıkalyq jáne halyqaralyq baıqaýlardyń laýreattary Erbol Tájibaev, Dıdar Ábdýhalyq, Nuraı Sherý, Álı Oqapov, Mádı Rymbaev, Gaýhar О́mirzaqova, Aqmarjan Qurmanbek sekildi ónerpazdar naqyshyna keltirip shyrqady.
