Qarlyǵash apa kilem toqýdy ájesi Zeınepten úırengen. Sol kisiniń qasynda júrip, jún sabaýdyń, jún tútý, ıirý, boıaý, arqaý daıyndaý degenniń ne ekenin kózben kórip ósti.
«Ol kezde analarymyz buzaýdyń bas jibinen bastap, arqan-shylbyr, saptama etikke deıin qoldan jasaı beretin. Eshkiniń túbitinen qolǵap, bókebaı, er adamdarǵa shalma toqıtyn. Jetpisinshi jyldarǵa deıin týǵandardyń bári kilem toqýdy biletin. Birinshi synyptan bastap kilem toqýǵa aralastym. Tórtinshi synypta kórshi úıde bir apta jatyp, kóptegen toqý ádisin úırendim», deıdi sheber.
Qarlyǵash Nurıddenqyzy kilemniń sarybaı, qaraman, araby, kesteli, altyaýyl dep atalatyn dástúrli túrlerin toqyp kórgen. Oıý-órnegi kelisken túkti, taqyr kilemderdiń birazyn búginde kelinderi, qyzdary, jaqyn aǵaıyndary tutynyp otyr.
Ismerdiń aıtýynsha, kilem toqý ónerindegi ár oıýdyń, ár boıaýdyń óz syry, óz tarıhy bar. Kilemniń arqaýyn daıyndaý, túr jipterin boıaý, jip ıirýdiń ózi qol ıkemimen qosa, tózim men tabandylyqty talap etedi.
Qarlyǵash Nurıddenqyzy qyryq bir jyl mektepte fızıka páninen sabaq berdi. Muǵalimdik pen qolónerdi qatar alyp júrgen ulaǵatty ustaz 2019 jyly zeınet demalysyna shyqqan soń, ájesinen qalǵan kilem aǵashyn qolǵa alyp, kilem toqýdy bastaıdy. Alǵashqy kilemin qyzynyń jasaýyna arnap toqyǵan.
«Sodan beri jylyna bir kilem toqımyn. Byltyr da bir túkti tósenishti jalǵyz ózim toqyp shyqtym. Kezinde qazirgi Aralbaı aýylynda Salıqa Omarbekova degen ataqty kilemshi kisi turdy. Ol kisi oblystyq, aýdandyq úlken kórmege arnaıy tapsyryspen Amangeldi Imanovtyń, Álibı Jangeldınniń portretterin toqyǵan. Salıqa apa súıekpen toqıtyn. Meni kilemniń shetin toqýǵa otyrǵyzatyn. Ol kisige meniń órip-shıratqanym unaıtyn. Salıqa apadan qarsy toqý, bos keste, eki jippen toqý degendi úırendim. Keıin Arqalyq qalasynyń kilem sehynyń arnaıy shaqyrtýymen kóship ketti», deıdi sheber.
