Kúıeýi Rahym Jeńisqalı ekeýi bir kezdesýden-aq shańyraq kótergen. Tanystyqtary da qyzyq. Qarajal qalasyndaǵy Zarına ápkesin uzatatyn bolady. Sodan jigit joldas bolyp, Rahym kelipti. Kólikteri buzylyp, uzatýǵa úsh saǵat keshigipti. Rahym toıdyń birinshi dastarqanynan soń, buzylǵan kóligin jóndeýge kirisedi. Kóligin jóndep bolyp, qolyn jýýǵa úıge kirgeninde Zarına «Fairy» alyp, aldynan shyǵady. Sodan uzatý aıaqtalǵan soń, qudalar aýylyna kelinderin alyp qaıtady. Sońynan qýǵynshylar da kóp uzamaı jolǵa shyǵady. Onyń ishinde qudasha Zarına da bar. Sóıtse, kólik jóndep júrgen jigit ónerli kórinedi. Qolyndaǵy dombyrasymen án salyp, betashar toıdyń kórigin qyzdyrady. Bı de qyza túsedi. Seri jigit Rahym sol ýaqytta qudashaǵa sezimin bildirip úlgeripti. Toı tarqaǵan soń, qudalar jolǵa shyǵaıyn dep jatqanda kólikteri buzylyp qalady. Sóıtip, qonyp qalady. Erteńinde Zarına uıqysynan tursa, Rahym kólik jóndep jatypty. Altynqoldy azamat kólikti otaldyryp, qudalardy aýyldyń shyǵa berisine deıin aq jol tilep, shyǵaryp salady. Zarınaǵa «aıaǵyńdy kórpege orap al» dep qamqorlyq tanytqany da qudashanyń kóńiline shýaq syılapty.
Rahymnyń janashyrlyǵy, óneri, qolynan is keletini Zarınanyń júregin birden baýraıdy. Sóıtip, Zarına úıine ketken kúni Rahym da vahtalyq ádispen jumysqa jol tartypty. Mahabbattyń ystyǵyn sezine bastaǵan ekeýi telefon arqyly 15 kún boıy jaqynyraq tanysypty. Sodan soń kezdesken kúni birden úılenýge usynys jasap, Zarına ony qabyl alyp, jarqyn bolashaqqa birge qadam jasaıdy. Ol kezde Rahym otyzǵa taıap qalǵan jigit, Zarına 18 jasqa da tolmaǵan.
«Jas aıyrmashylyǵy, alǵashqy kezdesý, qyp-qysqa tanystyq tańdaýyma kedergi bolmady. Onyń boıynda naǵyz er-jigitke tán qasıetti jas bolsam da birden ańǵardym. Jáne «alaqanymda aıalaımyn» degen ýádesin aldym. Bastysy, ýádesinde turyp keledi», deıdi jas kelin.
Zarına Ábdýhan – Qarajal qalasyndaǵy №5 mektepti altyn belgige bitirgen. Al byltyr jazda Qaraǵandydaǵy «Bolashaq» joǵary kolledjiniń mektepke deıingi tárbıe mamandyǵy boıynsha qyzyl dıplomyn alypty. Jaqyn kúnderi jumysqa da ornalasýdy josparlap otyr.
Jas qyzdyń júregin jaýlaǵan Rahym Jeńisqalıuly «Shubarkól kómir» AQ-da alyp tehnıka tizgindeıdi. 95 tonnalyq «Komatsu» markaly júk kóligin júrgizedi. Munymen qosa ónerli óren jumyskerler arasynan quralǵan «Qara Altyn» tobynyń beldi múshesi. «Kel, shyrqaıyq!» telejobasynyń jeńimpazy bolyp kelgen talantty top qazirdiń ózinde elge tanylyp qaldy.
Jas kelin ata-enesiniń aq batasyn alyp otyr. Atasy Jeńisqalı áleýmettik jelini júrgizýge únemi qoldaý kórsetedi. Shyn mánisinde, atasynyń meıirimi, nemerelerine degen mahabbat, qamqorlyǵy, kelinine degen syılastyq, qurmetin baıqatpaı telefonǵa túsirip alǵan Zarına sol qalpynda jelige júkteıdi. Tosynnan túsirgen vıdeolary mıllıondaǵan qaralym jınap, kópshilik tánti bolyp jatyr. Ásirese úıdiń sharýasyna kómektesip, manty túıip jatqan jarqyn sáti, nemerelerin oınatyp júrgen vıdeolary tipti, áserli.
О́negeli otbasynyń kóziniń aǵy men qarasyndaı Márııam jáne Aıjuldyz esimdi botaqandary bar. Kishkentaı qyzdarynyń erke qylyqtary úıdiń baqytyn eselep otyr.
Anasyndaı aıaýly bolǵan enesi Rahat – ardaqty ustaz. Kameradan qysylatyn kórinedi. Degenmen aldaǵy ýaqytta ene men kelin arasyndaǵy syılastyq mánin uǵyndyratyn kontent túsirýdi oılastyryp otyr.
Aýylynyń pysyq kelini kásippen de aınalysady. Byltyr Jańaarqa aýdany ákiminiń grant ıegeri atandy. Quıylmaly balmuzdaq, tátti maqta sekildi balalar súıip jeıtin dámdiler ázirleıdi. Jaqyn kúnderi «Táp-tátti» dúkenin ashqaly otyr.
Aýyldan at-tonyn ala qashatyn jas kelinderge Zarınanyń shýaqty ómiri ónege bolary sózsiz.
Ulytaý oblysy,
Jańaarqa aýdany,
Qaraaǵash aýyly
