Kelissóz barysynda taraptar mádenı-gýmanıtarlyq yqpaldastyqty odan ári damytýdyń keleshegin jáne birlesken bastamalardy iske asyrý máselelerin talqylady. Aıda Balaeva Qazaqstan men Qytaı arasyndaǵy qarym-qatynastyń joǵary deńgeıin atap ótip, yntymaqtastyqty aldaǵy ýaqytta da keńeıtýge múddeli ekenin jetkizdi.
«Búginde Qazaqstan men Qytaı arasyndaǵy qarym-qatynas jan-jaqty strategııalyq áriptestiktiń buryn-sońdy bolmaǵan bıik deńgeıine kóterildi. Bul, sózsiz, qos memleket basshylarynyń zor eńbeginiń nátıjesi. Biz óz tarapymyzdan yntymaqtastyqty odan ári tereńdetýge jáne elderimizdiń arasyndaǵy yqpaldastyqty keńeıtýge múddelimiz. Mádenı almasý jyly aıasynda birqatar birlesken jobany júzege asyrý múmkindigin qarastyrýdy usynamyz. Atap aıtqanda, kreatıvti ındýstrııalar festıvalin, teatr jáne sırk festıvaldaryn ótkizýge bolady. Byltyr Beıjińde Qazaqstannyń mádenı ortalyǵy ashylǵanyn atap ótkim keledi. Bul mádenı baılanystardy nyǵaıtýǵa qosymsha múmkindik beredi», dedi Mádenıet jáne aqparat mınıstri.
О́z kezeginde Lı Shýleı Qazaqstan men Qytaı mádenıetiniń toǵyspaly jylynyń ótýi eki el halqynyń jaqyndasýyna serpin beretin mańyzdy faktor bolatynyna senim bildirdi.
«Qytaı men Qazaqstan – senimdi dostar ári strategııalyq seriktester. Bizdiń qarym-qatynasymyz strategııalyq áriptestiktiń jańa kezeńine qadam basty. Memleketterimizdiń basshylary osy jyldy Mádenı almasý jyly dep jarııalady. Biz bul oqıǵaǵa aıryqsha mán beremiz jáne onyń aıasynda uıymdastyrýǵa bolatyn is-sharalardy talqylaýǵa ázirmiz», dedi Lı Shýleı.
Kezdesý barysynda taraptar birlesken jobalardy damytýǵa qatysty birqatar bastama kóterdi. Ásirese kınoındýstrııa salasyndaǵy yntymaqtastyqqa erekshe nazar aýdaryldy. Aıda Balaeva Qytaı aýdıtorııasynyń qazaqstandyq kıno úshin zor áleýetke ıe jáne iri kınokompanııalarmen áriptestik ornatýǵa múmkindik mol ekenin atap ótti.
Sondaı-aq taraptar birlesken derekti jáne kórkem fılmder túsirý, olardy keıin eki el aýmaǵynda ilgeriletý máselelerin talqylady. Lı Shýleı qazaqstandyq kınematografısterdi Shanhaı halyqaralyq kınofestıvaline qatysýǵa shaqyryp, bul alańnyń kınony damytý jáne mádenı baılanystardy nyǵaıtýdaǵy mańyzyna erekshe toqtaldy.
Budan bólek, taraptar beıneleý óneri salasyndaǵy yntymaqtastyqtyń keleshegine toqtalyp, birlesken plenerler men kórmeler uıymdastyrý, sondaı-aq eki el sýretshileri arasyndaǵy shyǵarmashylyq baılanysty damytý máselelerin sóz etti.
Basqosýda sonymen qatar Qazaqstan jáne Qytaı avtorlarynyń shyǵarmalaryn ózara aýdarý máseleleri talqylanyp, ádebı týyndylardy ekrandaýdyń áleýetine nazar aýdaryldy. Budan ózge, gastrolder men birlesken qoıylymdardy qamtıtyn teatr salasyndaǵy yntymaqtastyq máseleleri de kóterildi. Basym baǵyttardyń biri retinde týrızmdi damytý, onyń ishinde medıa ókilderi úshin tanystyrý týrlaryn uıymdastyrý máselesi de aıqyndaldy.
Sondaı-aq Beıjiń qalasynda Qazaqstan men Qytaı mádenıetiniń toǵyspaly jylynyń ashylýyna arnalǵan saltanatty Gala-konsert uıymdastyrylyp, is-sharaǵa myńǵa jýyq adam qatysty. Taǵylymdy kesh eki el arasyndaǵy dostyq pen ózara túsinistiktiń nyǵaıa túskenin bildiretin mańyzdy mádenı oqıǵa boldy.
Is-shara Qazaqstan Prezıdenti Qasym-Jomart Toqaev pen Qytaı Halyq Respýblıkasynyń Tóraǵasy Sı Szınpın arasyndaǵy 2026 jyl Qazaqstan men Qytaıdyń Mádenıet jyly bolyp jarııalanǵan ýaǵdalastyqtar aıasynda uıymdastyryldy.
Saltanatty keshtiń qurmetti qonaqtary qatarynda Premer-mınıstrdiń orynbasary – Mádenıet jáne aqparat mınıstri Aıda Balaeva, Qytaı Halyq Respýblıkasynyń Mádenıet jáne týrızm mınıstri Sýn Elı, Qazaqstannyń QHR-daǵy Tótenshe jáne ókiletti elshisi Shahrat Nuryshev, sondaı-aq dıplomatııalyq korpýs ókilderi men Qytaıdyń shyǵarmashylyq zııaly qaýym ókilderi boldy.
Qytaı ulttyq opera teatrynyń sahnasynda quttyqtaý sóz sóılegen Premer-mınıstrdiń orynbasary Aıda Balaeva Qazaqstan men Qytaı arasyndaǵy mádenı yntymaqtastyqtyń jańa mazmunmen tolyǵa túskenin atap ótti. Onyń aıtýynsha, búginde birlesken jobalar tabysty júzege asyrylyp, gastrolder, konsertter, kórmeler men festıvaldar turaqty túrde ótkizilip keledi. Sonymen qatar Beıjińde Qazaqstannyń mádenı ortalyǵynyń ashylýy eki el arasyndaǵy baılanysty nyǵaıtý jolyndaǵy mańyzdy qadam boldy. Mınıstr mundaı bastamalardyń bolashaqqa berik negiz qalaıtynyn jáne jas urpaqty jańa jetistikterge jigerlendiretinin erekshe atap ótti.
«Búgingi kesh – jaı ǵana konsert emes, aýdarmany qajet etpeıtin mádenıetter dıalogi. Memleket basshysy Qasym-Jomart Toqaev atap ótkendeı, mádenıet ulttyń bet-beınesin aıqyndaıdy, al álem eldi eń aldymen onyń óneri arqyly tanıdy. Osyndaı kezdesýler, mýzyka, teatr jáne shyǵarmashylyq arqyly biz bir-birimizdi tereńirek túsinip, jaqyndaı túsemiz. Mádenıetterdiń toǵyspaly jyly bizge jańa múmkindikter ashady. Birlesken jobalarǵa jol ashyp, shyǵarmashylyq izdenisterdi jandandyryp, ózara rýhanı baıytýǵa serpin beredi», dedi Premer-mınıstrdiń orynbasary.
О́z kezeginde Qytaıdyń Mádenıet jáne týrızm mınıstri Mádenıet jyly gýmanıtarlyq baılanystardy tereńdetip, ekijaqty yntymaqtastyqty damytýǵa yqpal etetin mańyzdy alań ekenin aıtty.
«Qytaı men Qazaqstan mádenıetiniń toǵyspaly jyly aıasynda eki eldiń mýzeıleri men ǵylymı-zertteý qurylymdary birlesip arheologııalyq zertteýler júrgizýge, óner qaıratkerleri Qytaı –Qazaqstan mýzykanttarynyń dóńgelek ústeli sııaqty alańdarda tereń dıalog ornatýǵa múmkindik alady. Sahnalyq óner men kreatıvti ındýstrııa salalarynda birlesken kadr daıarlaý jumystary da kúsheıtiledi. «Qytaı men Qazaqstan mádenıetiniń toǵyspaly jyly» mádenıet jáne óner uıymdary arasyndaǵy praktıkalyq yntymaqtastyqtyń mańyzdy platformasyna, sondaı-aq eki eldiń mádenı baılyǵyn tanytatyn jarqyn alańǵa aınalaryna senimdimiz», dedi Sýn Elı.
Gala-konsertke Qazaqstan men Qytaıdyń belgili óner maıtalmandary qatysty. Keshtiń aıryqsha rýhyn elimizdiń jetekshi shyǵarmashylyq ujymdary – Qurmanǵazy atyndaǵy Qazaq ulttyq halyq aspaptar orkestri, «Astana Opera» teatry, «HasSak» etno-folklorlyq toby, «Astana Balet» teatry, Beıjiń horeografııa ınstıtýty jáne Qytaı opera jáne balet teatrynyń ulttyq orkestri aıshyqtaı tústi.
