Sýretti túsirgen – Erlan OMAR, «EQ»
Seriktestiktiń bas dırektory Dıhan Qamzabekuly tarıhy tamyrlas, ortaq rýhanı qundylyqtarǵa ıe qos memleket arasynda jolǵa qoıylǵan baýyrlastyq qarym-qatynasqa oń baǵasyn bere kele, aldaǵy ýaqytta da barlyq salada ózara yqpaldastyq pen izgi baılanystar nyǵaıa bererine senim bildirdi.
«Qazaq jurty úshin parsy órkenıeti men mádenıetiniń orny aıryqsha. Jýyrda ǵana biz ortaq ulyq merekemiz – áz Naýryzdy keń kólemde atap óttik. Prezıdentimiz Qasym-Jomart Kemelulynyń ózi Ulystyń uly kúnine erekshe mańyz berip, Naýryznama onkúndigin toılaýdy ıgi dástúrge aınaldyrdy. Eki halyqtyń rýhanı qundylyqtarynda dúnıetanymdyq jaqyndyq bar. Qazaq tilinde parsy sózderi kóp kezdesetini sekildi parsy tili de túrki sózderinen kende emes. Bul – bizdiń baılanysymyz yqylym zamandar tereńine ketetinin ári ózara dostyq pen baýyrmaldyqqa negiz bolatynyn aıqyn kórsetedi. Sondaı-aq biz órkenıet tarıhy tereń Iran jerinde tynyshtyq ornap, óńirdiń berekesi artýyna tilektespiz», dep atap ótti D.Qamzabekuly.
Elshi Álı Ákbar Djoýkar myrza Qazaqstan men Irannyń qarym-qatynasy tek dıplomatııalyq deńgeımen shektelmeıtinin, bul tereń tarıhı, mádenı jáne órkenıettik tamyrlarǵa negizdelgen baılanys ekenin atap ótti. Sondaı-aq ózara ekonomıkalyq, saýda-sattyq alys-beristi de nazardan tys qaldyrmaı, jandandyra berý ýaqyt talaby ekenin aıtty.
Kezdesý sońynda taraptar aldaǵy ýaqytta da ózara yntymaqtastyqtyń jalǵasa bererine senim bildirdi. Dıhan Qamzabekuly Iran elshisine jýyrda jaryq kórgen Ábish Kekilbaıuly týraly kitapty syıǵa tartty.
«Qazaq pen parsy halyqtary qart Kaspııdiń qos tarapyn jaılap otyrmyz. Sol teńizdiń bergi jaǵasynda, qasıetti Mańǵystaý jerinde dúnıege esigin ashqan qazaqtyń áıgili jazýshysy Ábish Kekilbaıuly óz eńbekterinde Iran týraly da kóp derek keltirgen. Bul kitapta da sizdiń elińiz týraly málimetter az emes», dep atap ótti seriktestik basshysy.
