Búginde munaıly óńirdegi múgedekter sany 27 901 adamǵa jetip otyr. Onyń ishinde birinshi topta 3 001, ekinshi sanatta 9 977, úshinshi topta 9 869 múmkindigi shekteýli adam bar. Kámelet jasyna tolmaǵan múgedekter sany – 5 054.
Taǵdyrdyń teperishin tartqan jandarǵa arnap ashylǵan jańa ortalyq Almaly aýyldyq okrýginde ornalasqan. Buryn bul aýyl Mahambet aýdanyna qaraıtyn edi. Keıingi jyldary Atyraý qalalyq ákimdiginiń bólinisine berildi. Budan úsh jyl buryn osy aýylda qurylysy bastalǵan nysannyń jalpy aýmaǵy 22 myń sharshy metrdi quraıdy.
«Almaly» áleýmettik ońaltý ortalyǵynyń dırektory Anar Qaıýpovanyń aıtýynsha, mundaǵy qyzmet túri alty baǵytta – áleýmettik- turmystyq, medısınalyq, psıhologııalyq, pedagogıkalyq, áleýmettik-eńbek, mádenı ońaltý baǵyttarynda uıymdastyrylady.
«Ortalyq mamandarynyń basty maqsaty – múmkindigi shektelgen jandarǵa jaıly orta qalyptastyrý. Jańa mekeme keshendi ońaltýǵa arnalǵan zamanaýı qural-jabdyqtarmen jetkilikti qamtamasyz etilgen. Ár qyzmet alýshyǵa jeke ońaltý, áleýmettik beıimdeý baǵdarlamasy ázirlenedi. Olarǵa dárigerler, meıirgerler, psıhologter men logopedter, defektologter, barlyǵy 189 maman qyzmet kórsetedi», deıdi A.Qaıýpova.
Ortalyq mamandary bir mezette 150 adamdy qabyldaıdy. Osy kezge deıin jyl saıyn shamamen múmkindigi shektelgen 1 100 adamǵa ońaltý kómegi berilip kelgen. Endi mundaı qoldaý alatyndardyń sany 2 300 adamǵa deıin kóbeıedi.
Ortalyqta kámelet jasyna tolmasa da, múgedektik sanaty berilgen balalarǵa da erekshe nazar aýdarylǵaly otyr. Ásirese tirek-qımyly buzylǵan, serebraldy sal aýrýyna shaldyqqan, Daýn sındromy men aýtızm spektrindegi aýytqýy bar 3 pen 18 jas aralyǵyndaǵy balalarǵa keshendi ońaltý qyzmeti kórsetiledi. Osyǵan arnalǵan AVA-terapııa kabınetteri, mehanoterapııa zaldary, sensorlyq ıntegrasııa bólmeleri, sondaı-aq eńbek, art-terapııa sheberhanalary bar.
«Eresekterdi, ásirese birinshi, ekinshi toptaǵy múgedektik sanaty berilgen adamdardy ońaltý kýrsynan ótkizýge qolaıly jaǵdaı jasalyp otyr. Munda fızıoterapııa kabınetteri, zamanaýı qurylǵylarmen jabdyqtalǵan emdik deneshynyqtyrý zaly, basseın, sý emdeý kesheni bar», dedi A.Qaıýpova.
Atyraý oblysy
