Úkimettik emes uıymdar – memleket qoldaýynda

Keshe Astanada Premer-Mınıstrdiń orynbasary Berdibek Saparbaevtyń tóraǵalyǵymen Qazaqstan Úkimeti janyndaǵy úkimettik emes uıymdarmen (ÚEU) О́zara is-qımyl jónindegi úılestirý keńesiniń otyrysy ótti. Oǵan Májilis depýtattary, memlekettik organdardyń basshylary, halyqaralyq uıymdar men ÚEU ókilderi qatysty. Memleket pen ÚEU-nyń ózara árekettestigi jónindegi ózekti máselelerdi Úkimettik deńgeıde talqylaýdyń mańyzdy únqatysý alańy bolyp sanalatyn Úılestirý keńesiniń keńeıtilgen otyrysynda Berdibek Saparbaev qazirgi tańda atalǵan baǵyt boıynsha júrgizilip jatqan jumystarǵa jalpy sholý jasaı otyryp, jekelegen túıtkilderge nazar aýdardy. – Úkimettik emes uıymdar negizinen az qamtylǵan otbasy­lar­dyń, múgedek, jetim balalardyń máselelerin sheshýge tyrysyp jatady. Osynyń barlyǵyn biz de túsinemiz. Sondyqtan, úkimettik emes uıymdarǵa árdaıym qoldaý kórsetemiz. Sońǵy úsh jyldyń kóleminde memlekettik tapsyrysqa bólinetin qarjy 16 paıyzǵa artyp, ol 16 mıllıard teńgeni qura­dy. Qazirgi tańda elimizdiń 8 mıllıonǵa taıaý turǵyny úkimettik emes uıymdardyń qyzmetterimen qamtylǵan, – dedi Berdibek Saparbaev. Sondaı-aq, ol barlyq jergi­likti atqarýshy bılik oryndary atalǵan salaǵa qarajat bólip kele jatqanyn, alaıda, bul baǵytta oılandyratyn máseleler de bar ekenin jetkizdi. – Árıne, jyl saıyn 700 mıllıon teńgeden astam qarjy baǵyttap, barynsha qoldaý kórsetip jatqan oblystar da joq emes. Solardyń bir shoǵyryn atap óter bolsam, olar – Ońtústik Qazaqstan, Almaty, Pavlodar oblystary. О́kinishke qaraı, jyl saıyn memlekettik tapsyrys boıynsha bólinetin aqshalaı shyǵysty qysqartyp otyratyn óńirler de barshylyq. Mysaly, bıyl Soltústik Qazaqstan oblysy boıynsha bar bolǵany 91 mıllıon teńge qarastyrylǵan. Sol sııaqty, Energetıka mınıstrligi de, Bilim jáne ǵylym mınıstrligi de úkimettik emes uıymdarǵa bólinetin shyǵysty azaıtyp otyr. Aýyldarǵa jetkilikti deńgeıde kóńil bólinbeýde. Dáliregi, aýdan, aýyldarda úkimettik emes uıymdardyń qyzmeti durys jolǵa qoıylmaǵan. Mundaı jaǵ­daı Shyǵys Qazaqstan, Soltús­tik Qazaqstan oblystaryn­da baıqalýda, – dedi Premer-Mınıstrdiń orynbasary. Jıyn barysynda Ulttyq ekonomıka mınıstriniń birinshi orynbasary Marat Qusaıynovtyń «100 naqty qadam» Ult josparyn iske asyrý aıasynda memlekettik organ­dardyń áleýmettik mańyzdy mem­lekettik qyzmet túrlerin azamat­tyq qoǵam ınstıtýttaryna birtin­dep tapsyrý jónindegi habarlamasy tyńdaldy. Ol qazirgi tańda arnaıy qurylǵan Jumys tobynyń atalǵan baǵytta atqaryp jatqan sharalarynan habardar etti. Sonymen qatar, basqosýda Mádenıet jáne sport mınıstriniń orynbasary Marat Ázilhanov, Soltústik Qazaqstan oblysy ákiminiń orynbasary Anarhan Dúısenova, Aqtóbe oblysy áki­miniń orynbasary Sara Nurqa­tova jáne «Qazaqstannyń Azamat­tyq alıansy» zańdy tulǵalar birlestiginiń (ZTB) vıse-prezıdenti Artýr Platonov memlekettik organdardyń úkimettik emes uıymdarmen ózara is-qımyly, árekettestigi jóninde baıandady. Buǵan qosa, «Qazaqstannyń Azamattyq alıansy» ZTB-nyń atqarýshy dırektory Il­dar Katenov memlekettik áleý­mettik tap­syrystyń lottar taqyryp­ta­ryn qalyptastyrý boıynsha tús­ken usynystar jóninde aıtyp ótti. Basqosýdy qorytyndylaǵan Berdibek Saparbaev aımaq basshylaryna, Mádenıet jáne sport mınıstrligine, ózge de ortalyq memlekettik organdarǵa úkimet­tik emes uıymdarmen yntymaq­tas­tyq tájirıbesin jetildirýge jáne áleýmettik saladaǵy azamattyq bastamalardy júzege asyrýǵa qatysty hattamalyq tapsyrmalar berdi. Joldybaı BAZAR, «Egemen Qazaqstan».