«Aq joldyń» joly Taldyqorǵanǵa tústi

«Aq jol» demokratııalyq par­tııasynyń úgit-nasıhat ju­mys­taryn júrgizýi belsendi baǵyt alýda. Aptanyń aıaǵy, dem­alystyń alǵashqy kúnine túsken úgit sharalary Oral qalasynan bas­talyp, odan elordanyń tórinde kásipkerlermen kezdesýler ótkizilip, keıin­gide atbasy Taldyqorǵan qalasyna buryldy. Aqjoldyqtar el ekono­mıkasyn jaqsartý turǵysynda otandyq ónim óndirýshilerdi qoldaý úshin Taldyqorǵanǵa arnaıy kelgen edi. Taldyqorǵan qalasyndaǵy 740-tan astam adam jumys isteıtin «Qaınar» akkýmýlıator zaýytyna bet burǵan partııa ókilderi jylyna 1 800 000 dana akkýmýlıator shyǵaratyn zaýyt jumysshylarymen júzdesti. Partııa tóraǵasy Azat Perýashev pen onyń orynbasary, «Qazaq úni» gazetiniń prezıdenti Qazybek Isa jáne Májilis depýtattyǵynan úmitkerler qataryndaǵy Nurlan Jazylbekov pen Dmıtrıı Vasılev qatysqan kezdesýdiń máni partııanyń saılaýaldy baǵdarlamasyn túsindirý jáne ony jan-jaqty talqylaý jumystarymen aıqyndaldy. Ásirese, bıznesti qorǵaý jáne kásipkerlik salasy, naryqtyq reformalar jáne ekonomıka, bilim berý men densaýlyq saqtaý, jumyspen qamtý, turǵyn úı qurylysy, agroónerkásiptik keshen, rýhanı-mádenı sala, sybaılas jemqorlyqqa qarsy kúres jáne sot-quqyqtyq reformalary syndy basym baǵyttar baǵdary belgili boldy. Bul rette, otandyq ónim óndirýshilerdi qoldaý mańyzdy ekendigi atap kórsetildi. Sonymen qatar, Elbasy saıasatynyń bir nátıjesi retinde Eýrazııalyq ekonomıkalyq odaqtyń jumysyn ataýǵa bolatynyn jetkizgen partııa tóraǵasy búgingi kúnniń basty talaby – jumysshylardy qysqartpaq túgili, olardyń aılyq jalaqylaryn kóterý qajet ekendigin atap ótti. Sondyqtan da elimizde zamanaýı tehnologııasy bar, básekelestikke qabiletti kompanııalardy kóbeıte túsý qajet. Sonda ǵana biz ekonomıkamyzdy odan ári damytamyz. Eger óz ekonomıkamyzdy damytyp, ishki suranysty óteıtin bolsaq, ıaǵnı qýattylyǵy talapqa saı akkýmýlıatordy, ártúrli aıaq kıim bolsyn, san alýan azyq-túlikti ózimiz shyǵarar bolsaq, eńsemizben kók tireıtin bolamyz, dedi A.Perýashev. Jalpy alǵanda, eldegi ekonomıkanyń damýy, teńge turaqtylyǵy men otandyq ónimderdiń artýy jáne kásipkerlik salasyna keń jol ashý baǵyttaryn alǵa qoıyp otyrǵan partııanyń zaýyttarǵa kelip, ondaǵy jumysshylardyń jaǵdaıymen tanysýy — belsendi jumystardyń bir belesin bildirip otyr. Bul rette partııa ókilderiniń atqaryp jatqan jumystaryna, baıypty baǵyty men maqsattaryna rıza bolǵan zaýyt qyzmetkerleri biraýyzdan osy partııaǵa daýys beretindigin jetkizdi. Nurbol ÁLDIBAEV, «Egemen Qazaqstan». Almaty oblysy.