Úkili úmit, jan jylýy men keshirim kúni

Naýryzdyń merekesinde tarıh tabaldyryǵynan beri attaǵan meshin jylynyń kelisin kenshiler astanasy keńinen atap ótti. Bul kúni shahardyń basty kóshesi – Buqar jyraý dańǵylynyń boıynda qyryqtan astam kıiz úı tigilip, tańmen talasa turyp toıǵa aǵylǵan qala halqy men qonaqtardyń qarasy mol boldy. Buryndary uıym­das­ty­rýshylar alańǵa jıylǵan eldiń bárin kıiz úılerge kirgize ber­meýshi edi. Bul joly olar jyly qabaq tanytyp, qonaqty alala­maýǵa tyrysty. Aqshańqan úıler­diń kez kelgeniniń ishine kirip barsańyz, dámnen qaıysqan das­tarqan, quraq ushqan kútýshiler etno­mádenıetti tańsyq kórgen eldi qýana qarsy alyp jatty. Mysaly bıylǵy Naýryz meıramynda Qanysh Sátbaev atyndaǵy tarıhı-óndiristik murajaıynyń Jezqazǵannan arnaıy ákelingen kóshpeli kórmesine degen qyzyǵýshylyq zor boldy. Kórme «Qazaqmys» korporasııasynyń kıiz úıler etnoaýylynda ornalastyrylǵan edi. Kópshilik nazaryna kóne qarý-jaraq túrleri, ortaǵasyrlyq áshekeıler, turmystyq qural-jabdyqtar, ydystar usynyldy. Tipti, qala turǵyndary mundaǵy basty eksponat – Shyńǵys hannyń balaýyzdan jasalǵan músini janynda birge sýretke túsý úshin kezekke turyp jatty. Naýryz syndy kóktemniń kerim merekesiniń quıqyljyǵan saz, áýelegen án, myń buralǵan bısiz sáni kirgen be?! Oblystyq ákimdik aldyndaǵy Táýelsizdik alańynda qurylǵan  sahnada jergilikti ónerpazdar men etno-mádenı ortalyqtardyń ókilderi  tamasha konsert qoıyp, jıylǵan qaýymnyń janyn jadyratty. Jalpy, bul jolǵy Naýryz toıynda uıymdastyrýshylar turǵyndardyń talap-tilegin barynsha oryndaýǵa tyrysty. Jurt ishken-jegenge máz bolmaı, molynan bolǵan túrli mádenı jáne sporttyq sharalarǵa belsendi túrde qatysty. Ata-analarymen birge kelgen balalardyń da ishteri pyspaı, qyzyqqa qaryq boldy. Olardyń at-túıege minip, arbamen qydyrystap, merekeden úlken áser alǵany anyq edi. Qolónershiler de merekeni paıdalanyp, óz ónimderin ortaǵa jaıyp saldy. Ulttyq naqyshta jasalǵan zergerlik buıymdar, bylǵary ámııandar qyz-kelinshekterdi qyzyqtyrmaı qoımady. Bir sózben aıtqanda, sóre mańynda saýda-sattyq qyzý júrip jatty. Bıyl uıymdastyrýshylar tazalyq máselesine de qatty kóńil bóldi. Bul iske ekologtardyń qosqan úlesiniń súbeli bolǵanyn da aıtqan jón. Olar uzynnan-uzaq kóshe boıyna jasyl tústi qoqys jáshikterin ornatyp tastady. Jurt plastıkalyq shólmekter men tostaǵandardy beı-bereket laqtyra bermeı, álgi konteınerlerge salyp jatqanyn kózimiz kórdi. Merekeniń kórigi qyzǵan mezgilde toıshyl qaýymdy oblys ákimi Nurmuhambet Ábdibekov quttyqtady. «Naýryz meıramy – ata-babamyzdan qalǵan tamasha dástúr. Bul kúni ókpe-renishti qoıyp, bir-birimizge keshirimmen qaraýymyz kerek. Kóktem bizge ózimen birge úmit pen jylylyq ala keledi. Olaı bolsa, armandarymyz iske assyn!», dedi óńir basshysy. Qaraǵandydaǵy Ulystyń uly kúnine arnalǵan mereke tús aýǵanda ǵana sál saıabyr tapty. Qaırat ÁBILDINOV, «Egemen Qazaqstan». QARAǴANDY.