ASTANA. 6 maýsym. Keshe Aqtóbedegi atys kezinde 21 adamnyń qaza taýyp, 38 adamnyń ártúrli dene jaraqattaryn alǵany belgili bolyp otyr. Bul týraly Ishki ister mınıstriniń málimdemesine súıengen egemen.kz habarlady.
Ishki ister mınıstri Qalmuhanbet Qasymovtyń jýrnalısterge bergen málimeti boıynsha, Aqtóbede terakt jasaǵan qylmyskerlerdiń 12-siniń kózi joıylyp, 6-y jaraqat alǵan. Mınıstrdiń aıtýynsha, birinshi qarý dúkenindegi beınekamera arqyly 26 qylmyskerdiń bolǵany anyqtalǵan.
«Qazir biz barlyǵynyń aty-jónin bilemiz. Túnde jumys jasadyq. Qazirgi ýaqytta 12 qylmyskerdiń kózi joıyldy, 6-y jaraqat aldy. Endi qalǵan 6-7 adamdy izdep jatyrmyz. Olardyń qolynda 5 qarý qaldy», – dep habarlady mınıstr.
Jalpy, jedel-izdestirý sharalary barysynda 11 qarý tárkilengen.
Sonymen qatar Qalmuhanbet Qasymov 3 polıseı, 3 áskerı qyzmetker jáne 3 beıbit adam oqqa ushqanyn jetkizdi.
«Birinshi qarý dúkeniniń satýshysy men oqıǵa ornyna birinshi bolyp jetken kúzet qyzmetkeri qaza tapty. Al ekinshi qarý dúkeninde kelgen adam pyshaq jaraqatynan mert boldy. Jalpy alǵanda, 3 beıbit adam kóz jumyp, 2 adam jaralandy», – dedi ol.
Mınıstr málim etkendeı, buǵan qosa, keshegi qaqtyǵysta 3 polıseı men áskerı qaza tapqan.
«Qyzmetkerler arasyndaǵy ólim-jitimge toqtalsaq, birinshi qarý dúkenine kelgen 3 polıseı oqqa ushty. Túngi ýaqytta júrgizilgen jedel-izdestirý sharalary barysynda birli-jarym qyzmetker jeńil jaraqat aldy. Al áskerıler arasynda 3 adam – bir ofıser, kelisimshart boıynsha jáne merzimdi qyzmettegi 2 adam, sondaı-aq, áskerı bólimniń aýmaǵynda túrli sebeppen bolǵan 6 adam jaralandy», – dedi mınıstr.
Densaýlyq saqtaý jáne áleýmettik damý mınıstri Tamara Dúısenova Aqtóbede 5 maýsym kúni bolǵan atys saldarynan 38 turǵyn zardap shekkenin aıtty.
«38 adamǵa medısınalyq kómek kórsetildi. Ekeýi qaza boldy. 15 adam jeńil jaraqattar alyp, ambýlatorııalyq emge baǵyttaldy. 20 adam emhanaǵa jatqyzyldy. Olardyń 14-ine ota jasalyp qoıdy, taǵy úsheýine áli ota jasalýda, toǵyzynyń jaǵdaıy aýyr», – dedi Dúısenova dúısenbi kúni úkimettiń keńeıtilgen otyrysynda.
Sonymen qatar Ishki ister mınıstri Qalmuhanbet Qasymov Aqtóbedegi qarý-jaraq dúkeni men ulttyq gvardııanyń áskerı bólimine jasalǵan shabýyldyń terrorızm ekendigin de atap ótti.
«Biz munyń terrorıstik akt ekenin moıyndaımyz. Sondyqtan da zańǵa sáıkes bul deńgeı engizildi. Barlyq kúshtik qurylymdar kúsheıtilgen nusqaǵa kóshirildi. Biz barlyq nysandardy kúzetýge kóshtik. Bul nusqaǵa sáıkes birqatar qoǵamdyq, kóńil kóterý oryndarynyń jumystary toqtatyldy», – dedi Úkimet otyrysy aıasynda BAQ ókilderiniń saýaldaryna jaýap bergen ol.
Mınıstrdiń atap ótýinshe, qazirgi ýaqytta Aqtóbede ulttyq qaýipsizdik komıteti tóraǵasynyń orynbasary basqaratyn shtab jumys isteıdi. Sonymen qatar mınıstr shtab jumysyna jáne lańkestikke qarsy operasııalarǵa qajetti kúsh te, qural-jabdyq ta jetkilikti.
«Biz kópshilikti jumyldyrǵan joqpyz. Arnaıy maqsattaǵy birneshe sarbaz ǵana qosyldy. Al jalpy Aqtóbe óz kúshimen de tolyq áreket ete alady», – dedi ol.
Eske sala keteıik, keshe Aqtóbe ortalyǵynda qarýlanǵan top áskerı bólim men qarý-jaraq satatyn dúkenge shabýyl jasady.
Osydan soń oblys ákimi Berdibek Saparbaev turǵyndardy óte saq bolýǵa shaqyryp, antıterrorlyq operasııalardyń jalǵasyp jatqanyn jetkizdi. Qazaqstannyń Ishki ister mınıstrligi Aqtóbede bolǵan oqıǵaǵa radıkaldy dinı baǵyttaǵy toptardyń qatysy bar ekenin rastady.
Talǵat Raıymbek.
Derek, foto: Ishki ister mınıstrliginiń baspasóz qyzmeti.