Premer-Mınıstr Kárim Másimovtiń Almatyǵa sapary kezinde aıqyn ańǵaryldy
Keshe Premer-Mınıstr Kárim Másimov jumys babymen Almaty qalasyna keldi. Sapar barysynda ol Innovasııalyq tehnologııalar parki (ITP) jumysymen tanysty.
Búginde atalǵan park aýmaǵynda 145 kompanııa jumys isteıdi jáne ónimder men qyzmetterdiń 500-den astam túrin usynady.
Parktegi jobalardyń 60%-y aqparattyq jáne kommýnıkasııalyq tehnologııalar salasynda, al qalǵan 40%-y munaı-gaz sektory, aspap jasaý boıynsha júzege asyrylyp jatyr.
Sonymen qatar, tehnoparktiń ekinshi kezeńinde ǵylymı oqý oryndarynyń ǵımarattary – Qazaqstan-Brıtan tehnıkalyq ýnıversıteti jáne álemdik deńgeıdegi «Kásipqor» Holdıngi» kolledji salynýda.
Aıta keteıik, «100 naqty qadam» Ult Jospary baǵdarlamasynda Memleket basshysy Qazaqstanda ǵylymdy qajet etetin ekonomıkany qalyptastyrý úshin eki ınnovasııalyq ortalyqty aıryqsha atap aıtqan edi. Bul – Astana qalasyndaǵy Nazarbaev Ýnıversıtettiń «Astana bıznes-kampýs» jáne Almaty qalasyndaǵy Innovasııalyq tehnologııalar parki.
Almatyda Qarǵaly ózeniniń arnasyn qaıta jóndeý jumystary bastalǵan bolatyn. О́tken jyly bolǵan seldiń saldarynan munda jaǵany sý shaıyp jáne qalanyń úsh aýdanyn ishinara sý basqan bolatyn. Tabıǵat apatynyń aldyn alý jumystaryn Premer-Mınıstrdiń jeke ózi tekseredi.
Qazirgi tańda merdiger uıym ózen arnasyn tazartý jumystaryn aıaqtady, sondaı-aq, 10 kópirdiń 7-ine demontaj jasady jáne jaǵany nyǵaıtý úshin beton quıylyp jatyr.
Tabıǵı apattardyń saldaryn joıý úshin qalalyq bıýdjetten 2,3 mlrd. teńge bólingen bolatyn.
Kárim Másimov qala qyzmetteriniń basshylarymen jáne IIM basshysynyń orynbasary Iý.Ilınmen kezdesýde sý tasqyny jáne seldiń aldyn alý sharalaryn, sondaı-aq, Aqsaı, Úlken jáne Kishi Almaty ózenderiniń basseınindegi morena kólderiniń jaǵdaıyn talqylady.
Búgingi tańda Almatynyń bas josparynda iske qosý josparlanǵan «Saıaly» shaǵyn aýdanynyń 98 úıiniń 65-i salyndy. Jańa turǵyn úı keshenderi О́ńirlerdi damytýdyń memlekettik baǵdarlamasy aıasynda iske qosyldy. Sonymen qatar, 320 oryndyq balabaqsha men kóp qabatty parkıng paıdalanýǵa berildi.
Kárim Másimov Alataý aýdanyndaǵy muz aıdyny men Atletter aýylyn aralap shyqty. Ortalyq Azııadaǵy iri Muz aıdyny 12 myń orynǵa eseptelgen, munda qysqy Ýnıversıadanyń ashylý jáne jabylý saltanaty, sondaı-aq, short-trek, konkımen júgirý, mánerlep syrǵanaý jáne hokkeı jarystary ótedi.
Muz saraıynyń janynda 5 myń orynǵa shaqtalǵan sport kesheni, kınoteatry, basseıni, stadıony jáne kópqabatty turǵyn úıleri bar Atletıkalyq aýyl ornalasqan. Nysan 90% daıyn. Qala bıligi 30 tamyzǵa deıin Muz saraıy men Atletıkalyq qalashyqtyń qurylysyn aıaqtaýǵa ýáde berdi.
Esterińizge sala keteıik, 28-shi Dúnıejúzilik qysqy Ýnıversıada Almaty qalasynda 2017 jyldyń 28 qańtary men 8 aqpany aralyǵynda ótedi. Stýdentter oıynynda 55 memleketten 2 myńǵa jýyq sportshy qatysady dep kútilýde.
Sapar kezinde Premer-Mınıstr qaladaǵy hırýrgııalyq ortalyqta bolyp, mamandarmen kezdesti.
Sonymen qatar, qaladaǵy Álıhan Bókeıhanov mýzeı-úıinde bolyp, ǵalymnyń murajaıǵa qoıylǵan baǵaly eksponattarymen tanysty.
Saparbaı PARMANQULOV,
«Egemen Qazaqstan»