Premer-mınıstr Oljas Bektenovtiń tóraǵalyǵymen «Samuryq-Qazyna» AQ Dırektorlar keńesiniń otyrysy ótti. Jıynda Qordyń 2026 jylǵy birinshi toqsandaǵy kórsetkishteri men Prezıdent tapsyrmasy aıasyndaǵy iri ınfraqurylymdyq jobalardyń barysy talqylandy, dep habarlaıdy Egemen.kz.
Qordyń basqarma tóraǵasy Nurlan Jaqypov esepti kezeńdegi kiristiń 8%-ǵa, taza paıdanyń 93%-ǵa ulǵaıǵany týraly habarlady. Negizgi óndiristik kórsetkishter boıynsha jospar oryndaldy.
Bıyl sáýir aıynda «Samuryq-Qazyna» kompanııasynyń 3 mlrd ıýan bolatyn debıýttik panda-oblıgasııalaryn Qytaıdyń ishki naryǵynda sátti ornalastyrǵany mańyzdy qadam boldy. Ornalastyrý merzimi – 3 jyl, oblıgasııalardyń kiristiligi – jyldyq 2,18%, bul – qaryz alýdyń rekordtyq tómen quny ári naryqtyń qazaqstandyq qorǵa degen senimin kórsetedi. Bul qarajatty kólik-logıstıka, ınfraqurylym jáne taǵy da basqa salalardy damytýdy qosa alǵanda, ınvestısııalyq jobalardy júzege asyrýǵa baǵyttaý josparlanýda.
Sonymen qatar eseptik kezeńde birqatar mańyzdy qujatqa qol qoıyldy. Olardyń qatarynda «Taý-Ken Samuryq» AQ men Ngali Holdings (Rýanda) arasyndaǵy negizgi sharttar jónindegi kelisim (Term Sheet), sondaı-aq «Samuryq-Qazyna Invest» JShS men AZCON (Ázerbaıjan) arasyndaǵy Qazaqstan men Ázerbaıjan porttarynda sý túbin tereńdetý jumystaryn júrgizý jobasy boıynsha aksıonerlik kelisim jáne basqa da qujattar bar.
Úkimette óndiristi lokalızasııalaý boıynsha jańa kelisimderge qol qoıyldy
Prezıdent tapsyrmalary aıasynda jalpy quny 38,6 trln teńgeni quraıtyn munaı-gaz, munaı hımııasy, energetıka, kólik-logıstıka jáne taý-ken salalaryndaǵy 64 iri ınvestısııalyq jobany júzege asyrýǵa erekshe nazar aýdaryldy. 41 joba boıynsha ERS jáne SMR kelisimsharttary jasalǵan, olardyń 33-inde qurylys-montaj jumystary bastaldy. Atap aıtqanda, osy jyldyń naýryz aıynda Jambyl jáne Pavlodar oblystarynda árqaısysynyń qýaty 1 GVt bolatyn eki iri jel elektr stansasynyń qurylysy bastaý aldy. Jobalar «jasyl» energetıkany damytýǵa jáne BUU-nyń Ornyqty damý maqsattaryna (ODM) qol jetkizýge baǵyttalǵan. «Býtadıen» munaı hımııasy jobasy boıynsha Sinopec Guangzhou Engineering (QHR) kompanııasymen EPC-kelisimshart jasalǵan, jumystardy osy jyldyń mamyr aıynda bastaý josparlanýda. Taǵy 6 ınvestısııalyq joba jobalaý kezeńinde, al 17 joba ınvestısııa salý aldyndaǵy satyda tur.
«Beıneý – Bozoı – Shymkent» magıstraliniń ekinshi jelisiniń qurylysy, sondaı-aq Atyraý oblysyndaǵy «UIMT» arnaıy ekonomıkalyq aımaǵynyń máseleleri qaraldy. Joba kómirsýtek shıkizatyn tereń óńdeý salasyndaǵy iri óndiristerdi ınfraqurylymmen qamtamasyz etýdi kózdeıdi. Qazaqstan ónerkásibi men ekonomıkasy úshin geologııalyq barlaý salasynda jasandy ıntellekt tehnologııalaryn qoldanatyn «Taý-Ken Samuryq» jobasynyń mańyzy zor.
Jıyn qorytyndysy boıynsha Premer-mınıstr Oljas Bektenov Qor basshylyǵyna barlyq jobalar boıynsha baqylaýdy kúsheıtýdi jáne olardy júzege asyrý barysynda taýarlar, jumystar men qyzmetterdegi jergilikti qamtý úlesin arttyrý úshin barlyq qajetti sharalardy qabyldaýdy tapsyrdy.