Bıylǵy qystyń qalyń qary aýyldardy aq kórpege orady. Qalalarda bolsa mashınalar aýlalardan, kósheler mańyndaǵy joldardan qardy tonnalap tasyp álek. Qys qyzyǵy degen osy. Bos ýaqyt bolsa qala syrtyna shyǵyp, shańǵy, konkı teýip, shanamen syrǵanap, otbasyńmen demalyp, sergigenge ne jetsin.
Al Mıhaılovka aýylynyń turǵyny Aleksandr Drýzık balalardyń sabaqtan bos ýaqytynda qys qyzyǵyn kóńildi ótkizýlerine jańajyldyq syılyq jasapty. Sóıtip, Aleksandr ózi turatyn úıiniń janynan bıik syrǵanaq jasapty, tipti, balalarmen birge úlkender de shanamen syrǵanaıdy eken. Syrǵanaqtyń bıiktigi 3,5 metr, janynda jaryq janyp turady. Syrǵanaqtyń qasynan balalarǵa túsip-shyǵýlary jeńil, jyldam bolý úshin arnaıy saty da jasaǵan.
– Ártúrli áýender, mýzyka oınap turady. Kóńildi. Bizge jyl saıyn Aleksandr Drýzık osyndaı kóńildi syrǵanaq jasap beredi. Gadjetter, kompıýterlerden bir sát demalyp, taza aýada júremiz. Shaǵyn fýtbol alańymyz da bar, ashana ashyldy. Shahmat oınaýǵa da ýaqyt tabamyz, – deıdi balalar.
Olardyń aıtýynsha, aýyldyń taǵy bir turǵyny Vıktor Zalamaev kórshiles aýyl mektepteriniń oqýshylary arasynda shahmattan týrnır ótkizip turady eken. Ár aýyldan osyndaı demeýshiler tabyla berse deısiń.
Farıda BYQAI,
«Egemen Qazaqstan»
Pavlodar oblysy,
Jelezın aýdany