Búgin Japonııanyń Sapporo qalasynda ótip jatqan VIII qysqy Azıada oıyndary óz máresine jetti, dep habarlaıdy QazAqparat.
Qazaqstan sportshylary úshin Azıadanyń sońǵy jarys kúni óte tartysty jáne tabysty ótti. Bul kúni qorjynymyzǵa shańǵyshylar Sergeı Cherepanov - kúmis jáne Nıkolaı Chebotko - qola júlde syılasa, bıatlonshylar Iаn Savıskıı - altyn, Galına Vıshnevskaıa - altyn jáne Alına Raıkov kúmis enshiledi. Iýlııa Galsheva - kúmis jáne Dmıtrıı Raıherd- qola júlde syılasa, erler hokkeı komandasy el qorjynyna toǵyzynshy altyn medaldi syıǵa tartty.
Sonymen Qazaqstan ulttyq quramasy jalpy esepte 32 medal enshilep, (9 altyn, 11 kúmis, 12 qol) Azıada oıyndaryn tórtinshi orynmen aıaqtady. Bul, árıne jaman kórsetkish emes.
Jalpy esepte birinshi oryndy Azıada oıyndaryn uıymdastyrǵan Japonııa eliniń ókilderi jeńip aldy. Olardyń enshisinde 73 medal (26 altyn 22 kúmis, 25 qola) bar. Ekinshi oryndy Ońtústik Koreıa sportshylary qanjyǵasyna baılady. Olardyń qorjynynda 49 medal (16 altyn, 17 kúmis, 16 qola) bar.
Al úzdik úshtikten kóringen Qytaı eliniń qorjynynda jalpy 33 medal (12 altyn, 13 kúmis, 8 qola) bar. Al medal alǵan elder arasynda Japonııa, Ońtústik Koreıa, Qytaı jáne Qazaqstannan bólek bir memleket bar. Ol Soltústik Koreıa. Olardyń enshisinde jalǵyz qola medal tústi.
Jalpy VIII qysqy Azıada oıyndaryna 29 memleket qatysqan bolatyn. Sonyń 24 memleketi óz aýyldaryna júldesiz qaıtty.
Esterińizge sala keteıik, VIII qysqy Azıada oıyndary Japonııanyń Sapporo qalasynda 19-26 aqpan aralyǵynda ótti. Jarysta 29 eldiń sportshylary 11 sport túrinen 64 medal jıyntyǵyn sarapqa salady. Bul bási bıik dodaǵa elimizdiń namysyn 153 sportshy qorǵady.
Osy oraıda aıta keteıik, Azıada oıyndarynyń tarıhy 1952 jyldan bastalady. Al 1986 jyly alǵash ret qysqy Azıada oıyndary uıymdastyryldy. Aýqymdy jarys tórt jylda bir ret ótkizilip turady. Azıada oıyndary Azııanyń Olımpıadalyq keńesiniń basshylyǵymen júzege asyrylady. Qysqy Azıada oıyndarynyń tarıhyna úńiletin bolsaq, alǵashqy jarys osy Sapporo (Japonııa) qalasynda 1986 jyly 1-8 naýryz aralyǵynda ótken edi. Munda sporttyń 8 túri boıynsha júldeler sarapqa salynǵan. Atalmysh jarysqa 7 eldiń sportshylary qatysyp, tek 4 eldiń sportshylary ǵana júldeli oryndarǵa ıe bolǵan. Ekinshi qysqy Azıada oıyndary 1990 jyldyń 9-14 naýryz aralyǵynda taǵy da Sapporo qalasynda ótti. Munda sportshylar sporttyń 6 túri boıynsha baq synasty. 10 eldiń sportshylary qatysqan ekinshi qysqy Azıada oıyndarynan 5 eldiń sportshylary ǵana elderine júldemen oralǵan.
Qazaqstan Respýblıkasy 1996 jyly 4-11 aqpanda Harbın (Qytaı) qalasynda ótken úshinshi qysqy Azıada oıyndaryna alǵash ret qatysty. Bul joly sporttyń 7 túri boıynsha medaldar sarapqa salynǵan. Qytaı jerinde ótken jarysqa 17 eldiń sportshylary qatysyp, 5 eldiń sportshylary júldeli oryndardy ózara bólisken. Baıraqty básekede qazaqstandyq sportshylar 14 altyn medal enshilep, jalpy komandalyq esepte 2 orynǵa turaqtady.
1999 jyly Kangvon (Koreıa) qalasynda ótken 4-shi qysqy Azıada oıyndarynda da Qazaqstan sportshylary jaqsy óner kórsetti. Olar 10 altyn, 8 kúmis jáne 7 qola júldeni qanjyǵalaryna baılady. 2003 jyly Aomorı (Japonııa) qalasynda ótken jarysta da qazaqstandyqtar tamasha oıyn órnegin kórsete bildi. Japon jerinde otandastarymyz 7 altyn, 7 kúmis jáne 6 qola medalǵa ıe bolǵan. Al 2007 jyly Changýın (Qytaı) qalasynda ótken 6-shy qysqy Azıada oıyndarynda qazaqstandyq sportshylar 6 altyn, 6 kúmis jáne 6 qola medaldi qanaǵat tutty. 2011 jylǵa deıin qysqy Azıada oıyndary tek Japonııa, Qytaı, Koreıa elderinde ǵana ótkizilip kelgen. Al VII Qysqy Azıada oıyndary tuńǵysh ret TMD elderi arasynda Qazaq elinde baıraǵyn jelbiretti. Onda otandastarymyz 32 altyn, 21 kúmis, 17 qola medal enshilep, jalpy esepte birinshi oryndy jeńip alǵan bolatyn.
wMine, búgin Sapporoda ótken Azıada oıyndarynda jalpy esepte tórtinshi orynnan kórindi.