Astanada qalalyq fýtbol federasııasynyń uıymdastyrýymen buqaralyq aqparat quraldary ókilderi arasyndaǵy fýtbol birinshiliginiń alǵashqy maýsymy aıaqtaldy. Jarysqa barlyǵy 11 komanda qatysty.
BAQ lıganyń alǵashqy maýsymynda eshkimge ese jibermegen «Habar» arnasynyń jigitteri 26 upaımen chempıon atansa, sońǵy týrǵa deıin bul ataqtan úmitker bolǵan «Qazaq radıosy» 23 upaı enshilep, ekinshi orynǵa ıe boldy. Al úzdik úshtikti 19 upaımen «Sportsffa.kz» komandasy túıindedi.
«Jýrnalıster arasyndaǵy birinshilik mine, óz máresine jetti. Bul aldaǵy ýaqytta óz jalǵasyn tabady. Kelesi chempıonat osy jyldyń mamyr aıynda bastalady. Azdaǵan ózgerister de bolady. Jarysqa qatysyp, qyzyqty ótýine atsalysqandaryńyzǵa alǵys bildiremin. Olaı bolsa, mamyr aıyna deıin kezdeskenshe», - dedi Astana qalasy fýtbol federasııasynyń bas menedjeri Ǵalym Kenjalınov.
Úsh aıǵa jýyq ýaqytqa sozylǵan birinshilikte barlyǵy 24 gol soqqan «Sport 59» ujymynyń shabýylshysy Saparǵalı Qanat úzdik surmergen atanyp, «Altyn býtsa» syılyǵy men úzdik shabýylshy nomınasııasyn jeńip aldy. Sonymen qatar, «úzdik qaqpashy» «Habar» komandasynyń namysyn qorǵaǵan Aıbek Qabylshaǵa berilse, «úzdik qorǵaýshy» ataǵyna «Sportsffa.kz» oıynshysy Araı Izbaı ıe boldy. Al jýrnalıster arasynda erekshe oıynymen kózge túsken «Habar» ujymynyń kapıtany Nursultan Qurman «úzdik oıynshy» atandy.
«Kózdi ashyp-jumǵansha óte shyqty. Áriptesterimiz jyly pikirlerin bildirip jatyr. Kelesi maýsym budan da qyzyqty ári tartysty ótedi dep senemin. Aldaǵy ýaqytta qazaq sport jýrnalıstıkasyna eńbegi sińgen tulǵalardyń esimine arnalǵan juldyzdar matchyn ótkizýdi josparlap otyrmyz», - dedi BAQ lıgany uıymdastyrýshylardyń biri Ázız Jumadil.