Jýrnalısterdiń arasynda Valerıı Jandáýletovti bilmeıtinder kemde-kem. Búkil ómirin buqaralyq aqparat quraldaryna arnaǵan Valerıı Aıtmuqashuly sońǵy 25 jylda úzdiksiz Qazaqstan Prezıdentiniń Baspasóz qyzmetinde jaýapty qyzmet atqaryp qana qoımaı, Memleket basshysy baspasóz qyzmetiniń qalyptasýynyń basy-qasynda boldy. Táýelsizdik bederinde eldiń bedeline jumys istedi. Merzimdi baspasózdiń máselelerine qatysty qalam terbep, kitaptar shyǵardy. Qoǵamdyq ómirge belsene aralasty. Bir sózben aıtqanda, otandyq baspasózdiń damýyna bir kisideı eńbek sińirdi.
Jaqynda Almatydaǵy Qazaqstan baspasóz klýbynda Qazaqstan Jýrnalıstıka akademııasynyń «Altyn Samuryq» júldesi saltanatty túrde tabystalyp, atalmysh Akademııa akademıkteri bıyl bul júldege biraýyzdan Valerıı Jandáýletov laıyqty dep tapqan. Ol kisiniń qatysýymen tamasha derekti fılmder men Iý.Senkevıchtiń «Saıahatshylar klýby» telebaǵdarlamasynyń serııalary túsirilgenin aıtýǵa bolady.
Jarty ǵasyrǵa jýyq Jýrnalıster odaǵynyń múshesi bolǵan áriptesimiz – búginde Respýblıkalyq júıeli saraptama jáne boljaý ortalyǵynda sarapshy, bilgen-túıgenin jýrnalıstıkanyń keıingi býynymen bólisip júrgen tálimger tulǵa.
Aınash ESALI,
«Egemen Qazaqstan»
ALMATY