Elordadaǵy S.Seıfýllın atyndaǵy agrotehnıkalyq ýnıversıtette N.Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty Qazaqstan halqyna Joldaýynda kórsetilgen tapsyrmalardy júzege asyrý tetigi talqylandy. «Aýyl sharýashylyǵy óndirisine ınnovasııalyq tehnologııalardy, ósimdik suryptaryn jáne aýyl sharýashylyǵy maldarynyń asyl tuqymdaryn engizý» taqyrybymen uıymdastyrylǵan Májilistiń kóshpeli otyrysyna depýtattar men Aýyl sharýashylyǵy mınıstrliginiń, kommersııalyq emes bilim berý ortalyqtarynyń ókilderi, ǵalymdar men tájirıbeli mamandar jáne oqý ornynyń stýdentteri qatysty.
Májilis Tóraǵasynyń orynbasary Vladımır Bojko men Agrarlyq máseleler komıtetiniń tóraǵasy Saparhan Omarov basshylyq etken kóshpeli otyrysqa qatysýshylar aldymen ýnıversıtet bazasyndaǵy zerthanalardy, tájirıbelik-eksperımenttik platformalardy jáne Aýyl sharýashylyǵynyń bıotehnologııasy ǵylymı-zertteý ınstıtýtyn aralap, olardyń jumysymen tanysty.
Al talqylaý barysynda «Ulttyq agrarlyq ǵylymı-bilim berý ortalyǵy» KE» AQ basqarma tóraǵasy Asqar Nametov Qazaqstannyń agrarlyq-ónerkásiptik kesheniniń (AО́K) ınnovasııalyq damýyna járdemdesýi jónindegi uıymnyń qyzmeti týraly egjeı-tegjeıli baıandady. Sondaı-aq, alqaly jıynda sóz alǵandardyń qatarynda «S.Seıfýllın atyndaǵy Qazaq agrotehnıkalyq ýnıversıteti» AQ basqarma tóraǵasy Aqylbek Kúrishbaev ta boldy. Ol qatysýshylardy ýnıversıtettiń maman daıarlaý men biliktilik arttyrý boıynsha bilim berý baǵdarlamasymen jáne reformalaý júıesimen tanystyrdy.
Aıryqsha atap óterligi sol, keńeste depýtattar agrarlyq ǵylym men jańa tehnologııalardyń AО́K-niń básekege qabilettiligin arttyrýdaǵy mańyzdy rólin, ǵylym men aýyl sharýashylyǵy óndirisiniń tyǵyz ıntegrasııasyn, salany sapaly kadrlarmen qamtamasyz etý qajettiligin keńinen talqylady.
«Elbasy Joldaýynyń tórtinshi taraýynda bul salaǵa arnaıy toqtalǵan. Tipti, «agrarlyq sektor ekonomıkanyń jańa draıverine aınalýy tıis» dep naqty mindetteme de júktelgen. Demek, Qazaqstannyń agroónerkásip kesheniniń bolashaǵy zor», degen depýtat S.Omarov elimiz kóptegen pozısııalar boıynsha álemdegi iri agrarlyq eksporttyq ónim óndirýshilerdiń qataryna qosyla alatyndyǵyn atap ótti.
Sonymen qatar, alqaly jıynda Joldaý júktegen maqsat-mindetterdiń árbir tarmaǵy jan-jaqty taldanyp, tarazylandy. Máselen, aýyl sharýashylyǵyn ártaraptandyrý arqyly 2021 jylǵa qaraı elimizdiń azyq-túlik taýary eksportyn 40%-ǵa kóbeıtýdi kózdeıtin tapsyrmany júzege asyrýdyń tetikteri saralanyp, eńbek ónimdiligin arttyrýmen qatar, óndiris shyǵyndaryn tómendetý jaıy sóz boldy. Sol sııaqty jerdi paıdalaný tıimdiligin jetildirý men sýarmaly egis alańyn 5 jyl ishinde 40%-ǵa deıin keńeıtý arqyly egis alqabyn 2 mıllıon gektarǵa jetkizý qajettiligi aıtyldy.
Nurlybek DOSYBAI,
«Egemen Qazaqstan»