Ońtústik Qazaqstan oblysynda kóktemgi dala jumystaryna daıyndyq jumystary pysyqtaldy. Oblys ákimdiginde ótken selektorlyq májiliste sharýalardy arzandatylǵan janar-jaǵarmaımen qamtamasyz etý, nesıelendirý sharalaryn tezdetý, kooperatıvter qurý, jylyjaı kólemin arttyrý, shegertkemen kúres máseleleri jan-jaqty talqylandy, dep habarlaıdy OQO ákiminiń baspasóz qyzmeti.
Kóktemgi dala jumystaryna daıyndyq barysy jóninde oblystyq aýylsharýashylyq basqarmasynyń basshysy Serik Turbekov baıandama jasady.
Onyń aıtýynsha, egis kólemin, sýarmaly jerlerdi ulǵaıtý, ıntensıvti baý, jańǵaq, júzim sharýashylyǵyn damytý, shaǵyn mal bordaqylaý alańdary men sút fermalaryn, qus, balyq sharýashylyqtaryn damytý boıynsha ındıkatorlar aýdan, qala ákimdikterimen kelisilip bekitilgen.
Budan bólek, bıyl oblysymyzda 792,3 myń gektarǵa aýyl sharýashylyǵy daqyldary egiletin bolady. Bul ótken jylmen salystyrǵanda 3,7 myń gektarǵa artyq. Sondaı-aq 1500 myń gektarǵa ıntensıvti baý, júzim, jańǵaq otyrǵyzylmaq. Jylyjaı kólemi 300 gektarǵa artyp, tamshylatyp sýarý ádisi 7,2 myń gektar alqapta qoldanylatyn bolady.
Basqarma basshysynyń baıandamasyn tyńdaǵan oblys ákimi kóktemgi egis jumystaryna daıyndyq qaǵaz júzinde bolmaýyn eskertip, jylyjaılar kólemin ulǵaıtýdy tapsyrdy.
«Biz kúzde mol ónim alý úshin, búgingi daıyndyq jumysy joǵarǵy deńgeıde bolýy qajet. Barlyq aýdan, qala ákimderi men aýyl sharýashylyǵy bólimderiniń basshylaryna óndiristik jylyjaılardyń kólemin kóbeıtýdi tapsyramyn. Mejeli 300 gektarǵa jetkizý jumystary júıeli túrde atqarylýy tıis. Ondaǵy maqsat - elimizdi erte kóktemgi kókónispen qamtamasyz etý. Bul baǵyttaǵy jumystar meniń jeke baqylaýymda bolady», - dedi Janseıit Qanseıituly.
Aıta keteıik, Oblysta barlyq jylyjaılar kólemi 1123,1 gektardy qurap respýblıkadaǵy úlesi 87 paıyzǵa jetip otyr. Onyń ishinde ónerkásiptik jylyjaılar kólemi 67,7 gektar quraıdy.
Bıyl oblysymyzda mal sharýashlyǵy boıynsha 45 sút qabyldaý beketteri, 16 mal soıý pýnkteri, 10 qus sharýashylyǵy kooperatıvteri, 5565 birlik bordaqlaý alańdaryn qurý josparlanyp otyr. Budan bólek, 111 sút qabyldaý beketi, 56 mal soıý alańshasy, 33 qus sharýashylyǵy kooperatıvterin qurý josparda bar. Sondaı-aq bıyl óńirimizde 12796 bas mal bordaqylaý alańdary qurylatyn bolady.
Jalpy bıyl aýyl sharýashylyǵy taýar óndirýshilerine sýbsıdııanyń 41 túri boıynsha qoldaý kórsetiledi. Bıylǵy jyly kúrish, maqta, súrlem júgeri, jylyjaıǵa gektarlyq, maıly daqyl men maqtanyń ónimine sýbsıdııa tólenedi.
5 gektardan kóp alma baǵyna aport sorttyna 7 jyl kóleminde qoldaý kórsetiletin bolady. Tuqym sharýashylyǵyn damytý boıynsha otandyq tuqymdar men kóshetterdiń 70 paıyzy, sheteldik tuqymdardyń 30 paıyzy kóleminde sýbsıdııa berilmek. Byltyrǵy jyldan ereksheligi 1 gektarǵa paıdalanylatyn tuqym tolyǵymen sýbsıdııalanady.
Mıneraldy tyńaıtqyshtar boıynsha otandyq jáne sheteldik mıneraldy tyńaıtqyshtardyń naryqtyq qunynyń eń tómengi túri boıynsha 50 paıyzyna deıin sýbsıdııalanady jáne byltyrǵy jylǵy tuqym paıdalaný normasy shekteýi alynyp tastaldy.