Qaraǵandy memlekettik tehnıkalyq ýnıversıtetiniń stýdentteri taksı júrgizýshisin óltirip, avtokóligin zańsyz ıemdengenderi úshin 3-ten 19 jylǵa deıingi merzimge bas bostandyqtarynan aıyryldy, dep habarlaıdy QazAqparat
Búgin Qaraǵandy oblystyq qylmystyq ister boıynsha mamandandyrylǵan aýdanaralyq sotynyń úkimine sáıkes, Madııar Tústikbaev, Dıas Túmestaev pen Saǵyn Yqylas aıypty dep tanyldy.
Olar mas kúıinde taksıge otyrǵan. Taksı júrgizýshisi jigitterden jol aqysyn aldyn ala tóleýlerin suraǵan. Osyǵan baılanysty júrgizýshi Saıat Sultanbekov pen sottalýshy Saǵyn Yqylastyń arasynda janjal týyndaǵan. Sońǵysy ashýǵa býlyǵyp, júrgizýshiniń ıyǵy men moınynan pyshaq urǵan.
Qaza tapqan júrgizýshini oryndyǵynan túsirip tastap, Mersedes kóliginiń tizginine sottalýshylardyń biri otyrady. Kóliktiń terezesinen júrgizýshiniń eki uıaly telefony men pyshaqty laqtyryp jibergen. Keıin Respýblıka dańǵylynda ornalasqan turǵyn úıdiń aýlasyna kelip, kóliktiń ústindegi taksıge tıesili «9 regıon» belgisin jáne memlekettik nómirin alyp tastaǵan. Qujattardy órtep, Buqar jyraý aýdany Botaqara kentine qaraı jol tartady. Aýyldyń mańyna kólikti qaldyryp, ylǵaldy maılyqtarmen róldegi saýsaq izderin óshirgen.
Qaraǵandy oblystyq qylmystyq ister boıynsha mamandandyrylǵan aýdanaralyq sotynyń sýdıasy Islamhan Esenbaev aıyptalýshylardyń birin QR QK 99-baby «adam óltirý» boıynsha kináli dep taýyp, 19 jylǵa bas bostandyǵynan aıyrdy.
Qalǵan ekeýin avtokólikti zańsyz ıemdengeni jáne resmı qujattardy joıǵany úshin QR QK 200-baby men 384-baby boıynsha úsh jylǵa sottady.
Sot zardap shekken taraptyń azamattyq shaǵymyn qanaǵattandyryp, sottalýshylardy 2 mln teńge ótemaqy tóleýge mindettedi.