Memleket basshysy Aýǵanstan Islam Respýblıkasynyń Prezıdenti Mohammad Ashraf Ǵanımen telefon arqyly sóılesti, dep habarlaıdy Aqordanyń resmı saıty.
Áńgime barysynda taraptar ekijaqty qarym-qatynastyń qazirgi jaǵdaıy men perspektıvalaryn talqylady. Kóshbasshylar Aýǵanstan Prezıdentiniń Qazaqstanǵa 2015 jylǵy qarashadaǵy resmı saparynyń qorytyndysy boıynsha qol jetkizilgen ýaǵdalastyqtardyń iske asyrylý barysyna kóńilderi tolatynyn jetkizdi. Atap aıtqanda, sońǵy ýaqytta ózara taýar aınalymynyń kólemi aıtarlyqtaı artqany baıqalyp otyr.
Memleketter basshylary bıylǵy 12 aqpanda Qazaqstan men Aýǵanstan arasynda dıplomatııalyq qarym-qatynas ornaǵanyna 25 jyl tolýyna oraı birin-biri quttyqtady.
Sondaı-aq, taraptar Qazaqstan Respýblıkasynyń BUU Qaýipsizdik Keńesiniń turaqty emes múshesi retinde Aýǵanstan jónindegi komıtettiń tóraǵasy ekenin eskerip, Aýǵanstandaǵy ahýaldy talqylady.
Aýǵanstan Prezıdenti bıyl Astanada ótetin Shanhaı yntymaqtastyq uıymyna múshe memleketter basshylary keńesi otyrysyna, Islam yntymaqtastyq uıymynyń ǵylym jáne tehnologııalar jónindegi sammıtine qatysatynyn rastady.
Telefon arqyly sóılesýge Aýǵanstan jaǵy bastamashy boldy.