XXVIII Dúnıejúzilik qysqy Ýnıversıada dodasy Almaty úshin ǵana emes, búkil Qazaqstan úshin aıtýly oqıǵa boldy. 57 eldiń 2 000-nan asa jas sportshylary baq synasty. Osy Ýnıversıadaǵa qarap-aq keleshekte qysqy sporttyń qaı túrinen, qaı el, qaı shamada bolaryn baǵamdaýǵa bolatyn edi. Qazaqstan da óziniń qysqy sporttan artyqshylyǵy men kemshiligin túıip aldy.
Qazaqstanda qysqy sport túri kenje qalǵan. Tek qana shańǵy jarysy birshama damyǵan. Shaıbaly hokkeı óz aramyzda bolmasa, álemdik jarysta jarytyp júrgeni shamaly. Al, snoýbord, bıatlon, kerlıng, frıstaıl sııaqty qysqy sport túriniń ózi túgili, atyn da bilmeıtin edik. Oǵan qatysyp júrgen qarakóz ul-qyzdarymyz týraly beıhabar bolatynbyz.
Al endi, qysqy sport túrinen talaı ul-qyzdarymyzdyń eshkimnen kem emes ekenine qózimiz jetti. Keleshekte bular qysqy sport túrinen Qazaqstannyń kók baıraǵyn talaı jelbireter degen úmittemiz. Tek solardyń jetistigin buqaralyq aqparat quraldary der kezinde habarlap, nasıhattap otyrsa, durys bolar edi. Sporttyń qysqy túrlerimen aınalysatyn ulandarymyzdy eldiń kóbi Ýnıversıadadan keıin ǵana bilip jatyr. Bul da – Ýnıversıada ótkizgenimizdiń jemisi.
Eń qyzyǵy, qysy qysqa, qary az shymkenttik ul-qyzdarymyzdyń qysqy sportta jetistikke jetýi boldy. Estýimizshe, shymkenttik bes frıstaıl-akrobatshymyzdyń bári qazaqtyń ul-qyzdary eken. Frıstaıl-akrobatıka – qysqy sport túriniń eń bir qaýipti túri. Bizdiń jastarymyzdyń júrekteri shaılyqpaı osyndaı qaýipti sportpen aınalysýy qazaq rýhynyń kúshtiligin kórsetse kerek. Jalpy, qazaqtar jaı sportqa qaraǵanda qaýipti sportpen shuǵyldanǵandy táýir kóredi. Qaısarlyq pen ójettikti talap etetin boks, kúres, dzıýdo, taekvando, erejesiz jekpe-jek, t.b. sport túrinde qazaqtyń ul-qyzdary kóp. Bul – qazaqtarda saqtyq, túrkilik jaýyngerlik rýhtyń joıylmaǵanyn kórsetedi. Jastarymyz Ýnıversıadada 11 altyn, 8 kúmis, 17 qola, barlyǵy 21 medal alyp, jalpykomandalyq esepte 2-oryndy ıelendi. Dúrkiregen dúbirli doda Qazaqstan sportshylary úshin tabysty ótti deýge bolady.
Almatydaǵy Ýnıversıadadan keıin, ile-shala Japonııanyń Sappora qalasynda VIII qysqy Azııa oıyndarynda Qazaqstan sportshylary 9 altyn, 11 kúmis, 12 qola, barlyǵy 32 medal alyp, jalpykomandalyq esepte 4-orynǵa kóterildi. Bul da jaman emes. Endi Olımpıada oıyndarynda kók baıraǵymyz kókte kóbirek jelbiresin dep tileımiz.
Nazrahmet Qalı,
zeınetker
ALMATY