QR Bilim jáne ǵylym mınıstrligi "Bilim-ınnovasııa lıseıleriniń" tolyqtaı qazaqstandyq bilim berý mekemeleri ekendigi týraly, sondaı-aq olardyń óz qyzmetin qalyptasqan jaǵdaıda jalǵastyratyny týraly resmı málimdedi, - dep habarlaıdy QR BǴM baspasóz qyzmeti.
"Túrik Respýblıkasynyń Qazaqstandaǵy Tótenshe jáne О́kiletti Elshisi Nevzat Ýıanyktyń 2 naýryz kúni qazaq-túrik lıseıleriniń (QTL) Túrkııanyń bilim mınıstrligi basqarýyna ótetindigi týraly aıtqan bolatyn. QR Bilim jáne ǵylym mınıstrligi mundaı sharanyń bolý yqtımaldyǵynyń ózin resmı túrde joqqa shyǵaratyny týraly málimdeıdi. QTL "Bilim-ınnovasııa lıseıleri" bolyp qaıta qurylyp, qazaqstandyq bilim berý standarttary boıynsha jumys isteıdi", - delingen málimdemede. Sonymen qatar, aldaǵy ýaqytta QR Bilim jáne ǵylym mınıstrligi men QR Syrtqy ister mınıstrligi osy másele boıynsha birigip málimdeme jasaıtyny aıtylady.
Al oǵan deıin QR Bilim jáne ǵylym mınıstrligi qazaqstandyqtardy Túrkııa elshisiniń jasaǵan málimdemesi boıynsha alańdamaýlaryn suraıdy. "Bilim-ınnovasııa lıseıleri" jumysynyń ádettegi tártibi ózgerissiz qalady. "Bilim-ınnovasııa lıseıleri" - jurtshylyq arasynda joǵary bedel men qurmetke ıe bolyp otyrǵan bilim berý mekemesi.
Esterińizge sala ketsek, qazaq-túrik lıseıleriniń bári 2016 jyly "Bilim-ınnovasııa lıseıleri" bolyp qaıta qurylǵan.