Búgin Almatyda Premer-mınıstrdiń orynbasary – Mádenıet jáne aqparat mınıstri, Konstıtýsııalyq reformalar jónindegi komıssııa tóraǵasynyń orynbasary Aıda Balaeva bastaǵan «Ádiletti jáne Progressıvti Qazaqstannyń Halyqtyq Konstıtýsııasy úshin!» jalpyulttyq koalısııasynyń músheleri ǵylymı qaýymdastyq ókilderimen kezdesti, dep habarlaıdy Egemen.kz.
Otyrysqa Ǵylym jáne joǵary bilim mınıstri Saıasat Nurbek, Qazaqstan Ulttyq ǵylym akademııasynyń prezıdenti Aqylbek Kúrishbaev, ál-Farabı atyndaǵy Qazaq ulttyq ýnıversıtetiniń rektory Janseıit Túımebaev, Abaı atyndaǵy Qazaq ulttyq pedagogıkalyq ýnıversıtetiniń rektory Bolat Tilep, Qazaqstan Respýblıkasy Prezıdenti janyndaǵy Ulttyq ǵylym akademııasynyń akademıgi Vıacheslav Lokshın qatysty.
Kezdesý barysynda Aıda Balaeva elde júrgizilip jatqan konstıtýsııalyq reformanyń mańyzyna keńinen toqtalyp, Memleket basshysy Qasym-Jomart Toqaev bastamashylyq etken ózgerister ádiletti, ornyqty ári tıimdi memlekettik basqarý modelin qalyptastyrýǵa baǵyttalǵanyn atap ótti. Aýqymdy reformalar paketiniń negizgi baǵyttarynyń biri – bir palataly Parlamentke kóshý.
Koalısııa múshesi retinde Aıda Balaeva memleket mádenı áralýandylyqty damytýǵa, ǵylymı zertteýlerge jáne bilimge negizdelgen damýǵa strategııalyq basymdyq berip otyrǵanyn aıtty.
«Bul normalar ulttyq mádenıetti saqtaýǵa jáne jańǵyrtýǵa, progressıvti ult qalyptastyrýǵa, sondaı-aq ǵylym men ınnovasııany damytýǵa berik quqyqtyq negiz bolady dep esepteımin», dedi ol.
Sonymen qatar Qazaqstan Respýblıkasy Prezıdenti janyndaǵy Ulttyq ǵylym akademııasynyń vıse-prezıdenti Asqar Jumadildaev, jas ǵalym, ál-Farabı atyndaǵy QazUÝ-dyń ǵylym departamentiniń dırektory Qýanysh Tastambek jáne basqa da qatysýshylar joba erejeleri jónindegi pikirin bólisip, ǵylymı qaýymdastyqty bolashaq Qazaqstannyń quqyqtyq negizin qalyptastyrýǵa shaqyrdy.
«О́zderińiz kórip otyrǵandaı, jýyrda el Prezıdenti qaraýǵa jańa Konstıtýsııa jobasyn usyndy. Bul joba bir ǵana adamnyń emes, mol tájirıbesi bar 130 mamannyń uzaq ári muqııat taldaýynyń nátıjesi, sondaı-aq keń jurtshylyqpen jan-jaqty talqylaý negizinde ázirlendi. Komıssııaǵa túsken 10 myńnan astam usynys – osy jumystyń aıqyn dáleli», dep atap ótti Tlep Bolat.
Aıta keteıik, jańa Konstıtýsııa jobasy Memleket basshysyna usynyldy jáne 2026 jylǵy 15 naýryzda ótetin respýblıkalyq referendým arqyly halyqpen birge qabyldanady.