Eýrazııalyq Top (ERG) quramyndaǵy «Eýrazııa energetıkalyq korporasııasy» AQ-taǵy «Áıelder – óndiriste» atty fotokórme osy kásiporynda eńbek etip júrgen áıelderge arnaldy. Barlyǵy da sulý, ádemi, jaıdary, otbasynyń berekesi atanǵan ana, súıikti jar. Biraq, olardyń bárinen de ortaq eńbeksúıgishtik, rýhanı kúsh-qýatqa toly uqsastyq tabasyz. Kásiporyndaǵy eńbek etýshilerdiń tórtten bir bóligi – áıelder. Kórmeniń avtory elektr stansa ınjeneri Evgenıı Nabıev. Energetıkalyq korporasııasynyń kenshileri men energetıkteri qazirgi zaman talabyna saı jańashyl kompanııa qalyptastyrý úshin eńbek etýde. Alyp kásiporyn elimizdiń óńirlerine kómir, elektr qýatyn jetkizedi. Kórmege kompanııanyń úsh bólimshesi: Aqsý elektr stansasy, «Shyǵys» kenishi jáne О́ndiristik jóndeý bólimshesinde eńbek etip júrgen energetıkter, kranshylar, tokar, geologtar, kenshiler, aspaz áıelderdiń sýretteri qoıylǵan. Bul sýretterde stansa operatory Elvıra Abbakırova, qazandyqtyń jylý mólsherin qadaǵalaýshy Elena Leonteva, dánekerleýshi Karına Jýravleva, kranshy Záýresh Baıshalova, zerthanashy Anastasııa Demchenko, ken mamany Zýlfııa Serǵalıeva jáne basqalar bar. Bıikke órlegen krandy baǵyndyrýshy Evgenııa Shelıakına «Altyn qor-2016» kásibı sheberlik baıqaýyna qatysty.
– Bul kúnderi áıelder de erlermen qatar óz bilimderimen, biliktilikterimen kompanııanyń órkendep, ósýi úshin árqaısysy úles qosýda, – deıdi kompanııa qyzmetkeri Elena Garkava. – Elimizde ótken «Mereıli otbasy» ulttyq baıqaýynyń oblystyq kezeńinde kompanııadan K.Ahmetov, N.Nekrytov, G.Ganeev, S.Terentevter áýletteri qatysty. Barlyq áýletterdiń analary, qyzdary, jarlary óndiriste jumys isteıdi.
Bul fotokórme árkimdi de oılandyrary sózsiz.
Endi áıelder eńbegin kórsetetin kóshpeli fotokórme Aqsý elektr stansasynda, «Shyǵys» kenishinde ótedi. Maqsaty – óndiriste eńbek etip júrgen názik jandy áıelderdi jastarǵa, jas mamandarǵa úlgi etý.
Farıda BYQAI,
«Egemen Qazaqstan»
Pavlodar oblysy,
Aqsý qalasy
Sýretterdi túsirgen
Elena GARKAVA