Italııanyń Mılan men Kortına-d’Ampesso qalalarynda ótip jatqan HHV qysqy Olımpıada alamanynyń besinshi kúninde de sportshylarymyzǵa medal buıyrmady.
Qysqy Olımpııa oıyndarynyń besinshi kúninde bıatlonnan qyzdar alamanǵa qosyldy. 15 shaqyrymǵa júıtkigen shańǵyshylardyń arasynda senim men úmitimizdi arqalap Aısha Raqysheva men Mılana Genıova sóreden attanǵan edi. О́kinishke qaraı, Aısha óziniń alǵash qatysqan Olımpıada dodasynda 86-oryndy mise tutsa, Mılanaǵa 89-oryn buıyrdy. Shańǵyshlarymyz atý túriniń tórteýinde de nysana kózdeýden kóńil kónshitpedi, atqan oǵynyń toǵyzy dalaǵa ketti. Olımpıadanyń altyn, kúmis medalin fransýz sportshylary Jıýlıa Sımon men Lý Janmonno ıelendi. Qola medal bolgar qyzy Lora Hrıstovaǵa buıyrdy.
Júlde alamyz dep úmit etken sport túriniń biri frıstaıl-mogýl edi. Elimizdiń áıelder quramasy irikteý synynan súrinbeı ótip, fınaldyq kezeńge shyqty. Biraq Aıaýlym Ámirenova, Iýlııa Galysheva, Anastasııa Gorodko fınalda joǵary upaı jınaı almady. Aıaýlym 18-oryndy mise tutsa, Anastasııa 15-satyǵa ornyqty. 2018 jyly Phenchhan (Ońtústik Koreıa) Olımpıadasynda qola júlde enshilep, el mereıin asyrǵan Iýlııanyń ónerin qazylar 14-orynǵa laıyq dep baǵalady. Osylaısha, qyzdarymyz frıstaıl-mogýldan jekeleı jarysty júldesiz aıaqtady. Endi erteń paralleldi mogýldan synǵa túsedi. Frıstaıl-mogýldan quramanyń bas bapkeri Elena Krýglyhına sportshylar baryn salǵanyn jetkizdi. Erler dodasynda, sonymen qatar paralleldi mogýldan synǵa túsetin sportshylar senimdi aqtaýǵa tyrysatynyn aıtty.
Shańǵy qossaıysynan dodaǵa qosylǵan Shyńǵys Raqparov tuǵyrdan sekirý saıysynda 35-oryndy mise tutsa, shańǵy jarysynda kómbege 32-bolyp jetti. Bul básekede jeńis tuǵyryna Ens Lýros Oftebrý (Norvegııa), Iohannes Lamparter (Aýstrııa) Eero Hırvonen (Fınlıandııa) syndy sańlaqtar kóterildi.