Jýrnaldyń tusaýkeser rásimine Aqparat jáne kommýnıkasııalar mınıstri Dáýren Abaev, BUU balalar qorynyń ókilderi, belgili qoǵam qaıratkerleri qatysty.
Saltanatty rásimde sóz alǵan mınıstr D.Abaev jýrnal ujymyna tabys tiledi. «Men jańa jobaǵa shyn júrekten tabys tileımin. Mınıstrlik tarapynan qajetti kómekter kórsetiledi. Bul joba biz úshin, oqyrmandar úshin mańyzdy. Bul – balalardyń bastamasy, biz balalardy árqashan qoldaımyz», dedi mınıstr.
«GENERATIONNEXT» jýrnalyn Álılıa men Ámına Nárikbaevalar bastaǵan mektep oqýshylary shyǵarady. «Qazir taralyp jatqan aqparattardyń kóptigi sondaı, biz keı jaǵdaıda qajetti ári paıdaly dúnıelerdi anyqtaı almaımyz. Bizdiń jýrnal oqyrmandy alǵa jeteleıtin, senimimizdi arttyratyn aqparattardy jarııalaıdy. Qazirgi tańda elimizde jastyǵyna qaramastan keremet múmkindikterge qol jetkizgen ónerli, bilimdi, tabysty qurby-qurdastarymyz az emes, biraq jastar olardyń kópshiligin bile bermeýi múmkin. Endi olar týraly qyzyqty aqparattardy bizdiń jýrnalymyzdan oqýǵa bolady», deıdi apaly-sińlili Nárikbaevalar.
Jýrnaldyń bas redaktory Ásem Beriktiń aıtýynsha, jýrnal oqyrmandarǵa qyzyqty aqparat berip qana qoımaı, óz bolashaqtaryn aıqyndaýǵa, kásibı turǵyda jetilýge múmkindik beredi. «Bizdiń jýrnalymyz 10-19 jas aralyǵyndaǵy jastarǵa jýrnalıst bolyp qalyptasýǵa, mańyzdy ári qyzyqty aqparattarmen bólisýge, túrli kásip ıelerimen, qoǵamǵa paıdasyn tıgizip júrgen azamattarmen suhbattasýǵa múmkindik beredi», deıdi Ásem Berik.
5 myń dana tarylymy bar, qazaq, aǵylshyn jáne orys tilderinde shyǵatyn jýrnaldy mobıldik qosymshalardan da oqýǵa bolady. Basylymnyń alǵashqy nómirine jas ǵalym Dámel Mektepbaeva men tanymal ánshi Dınara Sultan jáne Nazarbaev Ýnıversıtettiń prezıdenti Shıgeo Katsýmen suhbattar jarııalanǵan.
Arnur ASQAR,
«Egemen Qazaqstan»
ASTANA