Ulystyń Uly kúni ultqa mura

Kók­tem­di qarsy alý saltanatyna qys boıy daıyn­dalǵan halyq ta kók­tem kelip, kún kózi kórine basta­ǵan­nan-aq bul mezgilden erekshe bir jylylyq, shýaq kútedi. Al Ulys­tyń uly kúniniń elimiz úshin bere­keli de merekeli shaq ekeni anyq.

Samarqannyń kók tasy erip, jer-dúnıe ásem kúıge bólen­gen shaqta oblystyq orta­lyq «Hı­batýlla Tarazı» meshi­ti Áz Naýryz merekesin uıym­das­tyrdy. Kúnderdiń sultany juma kúni namazdan shyqqan kópshilik meshit tarapynan daıyndalǵan arnaıy aq dastarqannan dám tatyp, naýryz kóje ishti. Sondaı-aq, bul kúni meshit aýlasyna segiz qanat kıiz úı tigilip, altybaqan quryldy. Naýryz meıramyna Taraz qalasynyń ákimi Rústem Dáýlet jáne birqatar memlekettik qyzmetshiler, eńbek ardagerleri arnaıy qatysyp, kópshilikpen birge boldy. Al qarııalar eldiń tynyshtyǵyn, aýyzbirligin tilep, qazaqy saltpen bata berdi.

Bul sharada Naýryz naqysh­tary keńinen kórinis tapty. Atap aıtsaq, Taraz qalalyq meshit­teriniń janynan qurylǵan ar­naıy top arqan tartý, láńgi tebý, gir tasyn kóterý, qoshqar palýan syndy ulttyq sporttyq saıys­tarda óz ónerlerin kór­setti. Júzden júırik shyq­qan jeńim­pazdar aqshalaı syılyq­tarmen marapattaldy. Al óńirimizge belgili aqyn-sazgerler án áýele­tip, kúı shalqytty.

Ulttyń uǵym-túsiniginde Ulys­tyń Uly kúni qaıyrym­dylyq, meıirimdilik merekesi bolyp sanalady. Bul kúni qaıyrymdylyq jármeńkesi ótkizilip, meshit atynan áleýmettik jaǵdaıy tómen otbasylarǵa kilem tabystaldy. Al meshittiń qyzdar, áıelder sektory áıel­der jamaǵaty úshin besik salar, tusaý keser syndy salt-dástúr rásim­derin ótkizip, ájeler mek­tebi jastarǵa ónegeli ósıetin aıtty. Meshit ustazdarynyń uıym­dastyrýymen kópshilikke rýha­nııat taqyrybynan vıktorına­lyq suraqtar qoıylyp, jaýap berildi.

«Hıbatýlla Tarazı» meshi­tiniń bas ımamy, Qazaqstan mu­sy­l­mandary dinı basqarma­sy­nyń oblystaǵy ókili Danııar qa­jy Jumabaev bul is-shara jas­tary­myzdyń ulttyq salt-dástúrge degen qurmetin ar­t­tyrý úshin uıymdastyrylyp otyr­ǵanyn aıtty. «Naýryz eshqan­daı da dinı meıram emes. Din men dástúrdiń sabaqtas ekenin eskersek, bul rýhanı mereke elimiz úshin de ıgilikti. Jastarymyz da babadan balaǵa mura bolyp kele jatqan áz Naýryzdy jan-júregimen túısinse, budan utylmasymyz anyq», deıdi Danııar Álımu­ham­med­uly. Shynynda da bul mereke Ulys­tyń Uly kúni ultqa mura eke­nin taǵy bir dáleldedi.

Hamıt ESAMAN,

«Egemen Qazaqstan»

Jambyl oblysy