Aldymen S.Muqanov atyndaǵy ǵylymı-ámbebep kitaphanada shved aqyny Gýnnar Ekeleftiń «Melnskaıa elegııa» atty óleńder jınaǵynyń tusaýkeseri ótti. Ony elshiniń áıeli Nadejda Volnova orys tiline tárjimalap, oqyrman qaýymǵa usynypty. Elshi mádenı oshaqqa HVIII ǵasyrda jaryq kórgen jádigerlerdi syıǵa tartty.
Kórkemóner murajaıynda belgili sýretshiniń qurmetine uıymdastyrylǵan ekspozısııa «Túzelmeıtin qatelik: alǵashqy jarylys» dep atalady. Akvarel boıaýlarymen jáne qara sııamen salynǵan týyndylar Abaı jerinde atom bombasynan zardap shekken beıbit turǵyndardyń aýyr hali men tirshiligi jaıly baıandaıdy. Týbe Krabo ajal oshaǵyna aınalǵan synaq alańy týraly jan-jaqty maǵlumat jınaǵannan keıin Qazaqstanǵa saparlaǵan.Tehnogendik zilzala oryn alǵan jerler onyń qııalyna qanat bitirip, ǵajaıyp dúnıeler týǵan. «Shaǵan kóli» dep atalatyn kartına tabıǵattyń mamyrajaı tynyshtyǵyn kózge elestetkenmen, astarynda ıadrolyq jarylystardyń sumdyq saldary jatqanyn ańǵarý qıyn emes.
– Kórmedegi sýretterdiń qaı-qaısysy bolsyn Qazaqstanǵa tikeleı qatysy bar. Byltyr Semeı polıgony jabylýynyń 25 jyldyǵyna oraı osyndaı ıgi sharalar Astana men Semeıde uıymdastyrylyp, ekijaqty yntymaqtastyqtyń arqasynda Qyzyljar jerinde jolymyz túıisti, – deı kelip, elshi Qazaqstannyń BUU Qaýipsizdik Keńesiniń turaqty emes múshesi bolǵanyn erekshe atap kórsetti.
О́mir ESQALI,
«Egemen Qazaqstan»
Soltústik Qazaqstan oblysy