Dana Abaıdyń jumbaǵy kóp, syry tereń, máni máńgilik muralaryn zertteýde ǵulama Muhtar Áýezov kóshin bastaǵan abaıtanýshylardyń dál qazirgi kezde beldi de bedeldisi, dástúr jalǵastyǵy men kósh tizginin qolǵa alǵan Mekemtas Myrzahmetuly ekendigi anyq. «Abaıtaný tarıhy» atty qundy eńbeginde ǵalym abaıtanýdyń tutas kartınasyn jasaıdy.
Mekemtas Myrzahmetulynyń eńbekteriniń ǵylymı qundylyǵyn oqyrman qaýymǵa keńinen nasıhattaý úshin ótkizilgen konferensııany jazýshy Marhabat Baıǵut júrgizip otyrdy.
«Abaı júrgen izbenen» atty konferensııada «Abaıdy Shyǵyspen baılanystyra zertteýshi – M.Myrzahmetuly», «Abaıdyń adamgershilik ilimi – M.Myrzahmetuly zertteýlerinde», «Mekemtas ǵylymynyń bıigi», «Baýyrjantaný ǵylymynyń negizin salýshy» degen taqyryptar boıynsha baıandamalar tyńdaldy.
Konferensııa barysynda qazaq ǵylymynyń iri tulǵasyn sózge tarttyq.
− Túrkistanda Iаsaýı atyndaǵy HQTÝ-diń qazyǵy qaǵylǵannan keıin ýnıversıtetke jumysqa shaqyryldym, – dedi Mekemtas Myrzahmetuly. – Rektoratta menen Iаsaýı týraly surady, shynymdy aıtsam, ózim bilińkiremeıdi ekenmin. О́ıtkeni, Keńes ókimeti qazaqty biriktirmeı, toz-toz etý úshin Iаsaýıdy jamandap, mansuqtap tastaǵan. Keıin shákirtterimmen tolyq zerttep, kitabyn shyǵardyq. Baıqaǵanymyz, Iаsaýı − qazaqty eshqaıda adastyrmas temirqazyǵy eken. Iаsaýı men Abaı barda qazaq aman bolady. Keıingi urpaq osyny bilýi kerek.
Qazaq múddesi úshin ot pen sýǵa túsip, adaldyǵynan aınymaıtyn kórnekti ǵalym osylaı deıdi.
Baqtııar TAIJAN,
«Egemen Qazaqstan»
Ońtústik Qazaqstan oblysy