– «Týǵan jer» baǵdarlamasyn iske asyrýda almatylyqtardyń alar orny erekshe bolady dep senemin, – dep sóz bastaǵan qala ákimi Baýyrjan Baıbek odan ári bylaı dedi: «Bizdiń qala men onyń jaýapkershilikti, áleýmettiń máselelerinen qashpaıtyn turǵyndary úshin maqalada kórsetilgen ıdeıalar men úlgiler óte jaqyn. Máselen, ótken jyldary kásipkerlerdiń qoldaýymen qala aýlalarynda 100-den astam sport alańqaıy ashylyp, 10 shaqty úlken balabaqsha salyndy. Memleket-jekemenshik áriptestik qaǵıdasymen 600 oqýshyǵa arnalǵan, jańa talaptarǵa saı jaıly mektep turǵyzyldy. Taǵy bireýiniń qurylysy aıaqtalmaq. Qaıyrymdylyq kómek, mesenattyq qoldaý qanshama! Osynyń bári túptep kelgende elge degen perzenttik súıispenshilik sezimmen tyǵyz baılanysty».
Táýelsizdik alǵan jyldary Almatyda nebary 18 ǵana, onyń ózinde qazaqsha-oryssha tárbıeleıtin memlekettik balabaqsha bolatyn bolsa, búgin onyń sany 157-ge jetti. Al mektep sany 7-den 65-ke deıin ulǵaıyp, ondaǵy bala sany 11 myńnan 104 myńǵa deıin, ıaǵnı 10 esege ósken. Búginde úsh tuǵyrly til saıasatyn damytýdy kózdegen jastardyń bilikti is-qımyldary jan súısintedi. Elbasy maqalasynda kópshilik talqylaýyna túsken máselelerdiń biri – 2025 jylǵa qaraı baspa isin, is qaǵazdary men oqýlyqtardy latyn álipbıinde basyp shyǵarý bolatyn. Al latyn qarpi kúndelikti ómirimizge dendep kirse, aqparattyq tehnologııa tilin túsinip, álemniń ozyq elderimen terezemizdiń teńese túsýine múmkindik artady.
El Táýelsizdiginiń 25 jyldyǵy men Almaty qalasynyń 1000 jyldyǵy sheńberinde qazirgi zamanǵy mýltımedııalyq «Alataý» dástúrli óner teatry men «Mýltımedııalyq dástúrli óner ortalyǵy» mýltımedııalyq júıeler arqyly qazaq, orys jáne aǵylshyn tilderinde el mádenıetiniń erekshelikteri jóninde maǵlumat alýǵa múmkindik beredi.
Qazaqstannyń halyq ártisi Asanáli Áshimov: «Elbasymyz somdaǵan jasampaz ult formýlasy – ǵaıyptan túsken, bolmasa oıdan shyǵarylǵan qaǵıda emes. Bul – jalpy álemdik, barshamyzǵa qatysy bar tarıhı shyndyq», dese, Qazaqstan Jazýshylar odaǵynyń tóraǵasy Nurlan Orazalın: «Bizder ádebıet pen óner ıeleri Elbasynyń rýhanı jańǵyrý ustanymyn qoldaımyz. Bul bizdi, halyqty qanattandyrady, bul Elbasymyz usynyp otyrǵan uly kósh», dedi. Al Qazaqstannyń eńbek sińirgen qaıratkeri Shámsha Berkimbaeva «Maqalada kórsetilgen Prezıdent usynǵan latyn álipbıine kóshý, bilim salasyn arttyrý jáne basqa da jobalardyń barlyǵyn iske asyrýda ustazdar qaýymy árdaıym aldyńǵy shepte júretinine kúmándanbańyzdar», dep oı túıindedi.
Bolashaqtyń kilti – kózdegen maqsatqa kol jetkizý men zaman talabyna saı kóne men búgingini qısyndy ushtastyrý, ózimizdiń rýhanı kodymyzǵa súıene otyryp, rýhanı jańǵyrýda ekenine shynaıy kóz jetkizgen kópshilik alqaly jıynda ortaq bir mámilege, bir sheshimge toqtap, bátýaly uıǵarym jasady.
Talǵat SÚIINBAI,
«Egemen Qazaqstan»
ALMATY