Bıylǵy talapqa saı Ulttyq biryńǵaı testileý eki kezeńde ótkeli otyr. Birinshisi- qorytyndy attestattaý – bul memlekettik bitirý emtıhany. Ekinshisi - UBT - joǵary oqý oryndaryna túsý emtıhany. Qorytyndy attestattaý mektepte bes pánnen onyń ishinde 4 mindetti, 1 tańdaý páni boıynsha ótedi. Barlyq emtıhandar, onyń ishinde testileý de bilim alýshynyń ózi oqıtyn mektebinde ótkiziledi.
Aıta keteıik, emtıhanǵa berilgen baǵalaýmen kelispegen jaǵdaıda, bitirýshi kelesi kúngi saǵat 13.00-ge deıin aýdandyq, qalalyq bilim bólimderiniń jáne oblystyq bilim basqarmalarynyń janynan qurylǵan komıssııaǵa shaǵymdanýyna quqyǵy bar. Emtıhandar shamamen 2017 jylǵy 29 mamyr men 9 maýsym aralyǵynda ótkiziletin bolady.
«Qorytyndy attestattaýdyń barlyq materıaldaryn daıyndaýdy jáne bilim basqarmalaryna deıin jetkizýdi Ulttyq testileý ortalyǵy, al mektepterge deıin jetkizýdi bilim basqarmalary uıymdastyrady. Sondaı-aq jazbasha jáne aýyzsha emtıhandy baǵalaýdy, berilgen durys jaýap kodtary negizinde jaýap paraqtaryn tekserýdi mektepte qurylǵan emtıhan komıssııasy ár pán boıynsha júrgizedi», - deıdi Raýshan Estleýsqyzy.
UBT joǵary oqý ornyna túsý emtıhany jáne memlekettik granttardy bólý júıesi retinde qalady. Jańa formatyna saı UBT-ǵa 5 pán boıynsha 120 suraq bekitilip otyr. Onyń 3-i mindetti jáne talapkerdiń joǵary oqý ornyna tapsyratyn mamandyǵyna baılanysty 2-i beıini boıynsha qarastyrylýda. Al, testileý ýaqyty 3 saǵat 30 mınýtty quraıdy. Shekti ball 50 ózgerissiz qalady.
Testileýge qatysýǵa ótinish qabyldaý 10 naýryz - 10 mamyr aralyǵynda UBT-ny ótkizý pýnktteri arqyly júzege asyrylady. UBT-ny ótkizý merzimi – 20 maýsym men 1 shilde aralyǵyna belgilenip otyr. 2017 jylǵy tamyz aıynda jáne 2018 jyldyń qańtar aıynda UBT-ny aqyly negizde qaıta tapsyrý múmkindigi beriledi. Shekti ball – 50.
«Altyn Belgi» ıegerleri, jalpy bilim beretin pánder boıynsha halyqaralyq, respýblıkalyq olımpıadalardyń, ǵylymı jobalardyń jeńimpazdary men júldegerleri UBT-ny jalpy negizde tapsyrady. Sondaı-aq ball sany birdeı bolǵan jaǵdaıda bilim berý granttaryn alý basymdyǵy eskerilgen. Mysaly, eger bitirýshi jáne «Altyn Belgi» ıegeri de 122 ball alsa, grant «Altyn Belgi» ıegerine beriledi. Eger bitirýshi kóbirek ball jınaǵan jaǵdaıda, «Altyn Belgi» ıegerine basymdyq berilmeıdi. Jalpy bilim beretin pánder boıynsha 5 halyqaralyq olımpıadanyń jeńimpazdary men júldegerlerine arnaıy granttar bólinedi.
Budan bólek, aldyńǵy jyldardaǵy mektep bitirgen jáne tehnıkalyq jáne kásiptik bilim berý ornyn bitirgen túlekter úshin joǵary oqý ornyna túsý úshin keshendi testileý ótkiziledi. Keshendi testileýge ótinish berý merzimi aǵymdaǵy jylǵy 1-20 maýsym aralyǵy dep belgilenip otyr. Testileý ótkizi merzimi 17-23 shilde aralyǵy. Testileý ýaqyty – 1 saǵat 40 mınýt (100 mınýt). Keshendi testileý oblystaǵy JOO-nyń bazasynda ornalasqan testileý ortalyqtarynda júrgiziledi.