BUL – BARShAMYZDYŃ BAǴYNDYRǴAN BIIGIMIZ Jylda osy. Gazettiń birinshi betine Prezıdenttiń Jańa jyldyq quttyqtaýy da, Elbasynyń fotosy da salynyp úlgergende de, jyldyń sońǵy kúninde kóp oqıǵa, jıyn-jınalys bola qoımaıtyndyqtan basqa better de jasalyp qalǵanda da, nómirdiń osy bir tusy tolmaı turady. Tolmaı turatyny – “Egemen Qazaqstan” basylatyn baspahanalardan alynatyn eń sońǵy málimetter bolmaı turady.
Mine, jańa ǵana gazetimiz shyǵatyn Astana, Almaty, Qyzylorda, Aqtóbe, Shymkent, Pavlodar, Taraz, Oral, Qaraǵandy, Taldyqorǵan, О́skemen, Atyraý qalalaryndaǵy baspahanalardan sol málimetter kelip tústi. Ár baspahananyń erteńgi nómirdi qansha danamen basqaly jatqanyn qosyp kep jibergende biz myna shaǵyn maqalanyń basyna qoıǵan san shyǵa keldi. 160 412! Iá, búginnen bastap “Egemen Qazaqstan” osyndaı taralymmen taraıdy. Bir jyldyń ishinde taralym 10 myńǵa ósti! Kúzde mınıstrligimizdiń keńeıtilgen alqa májilisi ótken. Sóılegenbiz. Mınıstrdiń keler jylǵy taralymnyń jaıy jónindegi suraǵyna “Shamamen 155 myńnyń mańaıyna baratyn shyǵarmyz”, degenbiz. Solaı aıtýyn aıtqanmen, gazetter tynbaı jazyp, telearnalar tynbaı kórsetip jatqan qarjy daǵdarysy oqyrmandardyń baspasózge jazylym kezindegi kóńil-kúıine áser eter me eken, ondaı jaǵdaıda taralymnyń ótken jylǵy deńgeıin saqtap qalýdyń ózin olja sanaǵan jón-aý degen alań kóńildiń bolǵany da ras edi. Endi sol kúdik-kúmánniń bári seıilip sala berdi. Búkil álemdi jaılaǵan qarjy daǵdarysynyń bizdiń elimizdegi ahýalǵa yqpal jasaı almaǵanyn “Egemen Qazaqstanǵa” jazylýshylar qatarynyń qalyńdaı túskeninen de kórýge bolady. Eksporttyń kólemi jartysyna deıin kemip ketken, sol jartynyń óziniń quny birneshe ese arzandap ketken jaǵdaıda da jalaqyny, zeınetaqyny, shákirtaqyny ýaqtyly berip qana qoımaı, buryn mejelengen deńgeıde ósirip otyrǵan El úshin, ekonomıkany ártaraptandyrýdyń jasampazdyq josparlaryn júzege asyrý arqyly óndiris aýqymyn azaıtpaýǵa, qaıta ósirýge qol jetkizgen, birde-bir bankti bankrottyqqa uryndyrmaı aman alyp qalǵan, aqyr aıaǵy alaıaqtarǵa aldanǵan úleskerlerge deıin úılerine kirgizip otyrǵan Er úshin osyndaıda qalaı maqtanbassyń, aǵaıyn! 160 412. Bul san – el gazeti óziniń toqsan jyldyq toıynyń tusynda baǵyndyrǵan bıik. Bul san – qazirgi kezeńdegi qazaq rýhy baǵyndyrǵan bıiktiń bir ólshemi. Bul sannyń astarynda halqymyzdyń eldik sanasynyń ornyǵa túskeni tur, bul sannyń astarynda qazaq tiliniń deńgeı-dárejesi, onyń memlekettik til retindegi mártebesiniń óskeni tur, bul sannyń astarynda el turǵyndarynyń ál-aýqaty jaqsarǵany tur. Demek, bul – barshamyzdyń baǵyndyrǵan bıigimiz. Jaqynda ǵana gazetimizdiń toqsan jyldyǵyna baılanysty quttyqtaýǵa, bas basylymnyń jańa ǵımaratyn ashýǵa kelgende Prezıdent Nursultan Nazarbaev “Arna Medıa” ulttyq aqparattyq holdıngine qarasty BAQ basshylaryna suhbat bergeni belgili. Sonda Elbasy “Egemen Qazaqstannyń” taralymyna arnaıy toqtalyp, “38 myńnan 150 myńǵa deıin ósý gazettiń qazirgi deńgeıin bildiretin kórsetkishterdiń biri ǵoı. Mine, munyń ózi-aq úlken baǵa. Iаǵnı, gazet qajet, oqylady, qyzǵylyqty degen sóz. Sizderdiń jumystaryńyzǵa berilgen eń ádil, eń dál baǵa osy” degen bolatyn. Sol baǵany bizge Siz berip otyrsyz, ardaqty oqyrman! Osy tańdaýyńyz arqyly Siz ózińizdiń týǵan memleketińizben birge tynystaıtyn, elim deıtin, jerim deıtin, tilim deıtin júregińizdi tanytyp otyrsyz, osy tańdaýyńyz arqyly Siz ózińizdiń alash qamyn oılaǵan azamattyq kelbetińizdi tanytyp otyrsyz. Rahmet Sizge! Eldik degen osyndaıdan quralady. Ulttyq rýh osyndaıdan da tanylady. Jańa jylda jazar jaqsylyǵymyz, jetkizer jańalyǵymyz kóp bolsyn!
Saýytbek ABDRAHMANOV.