Bul jańalyq kórermenderdi eleń etkizdi desem, ótirik bolar. О́ıtkeni, mundaı habarlar jıi qaıtalanady. Ustalyp jatyr, ustap jatyr... Aramshópterdi otaǵan jaqsy, alaıda onyń túbirin joıǵan odan da jaqsy.
Nege biz olarmen kúreste sharasyzbyz? Sebebi, jezókshelerge qatysty qatań jazaǵa tartatyn zań áli joq. Olardy ustaıdy, ýaqytsha qamaıdy. Al ári qaraı qylmystyq is qozǵaýǵa qaýqarsyz.
Osyndaı kórinisterge qarap, keıde boıyńdy eriksiz úreı bılep ketetini bar. Qoǵamymyzǵa indet bolyp jabysqan azǵyndyq áreketter óskeleń urpaqtyń sanasyn ýlap ketpeı me dep kúdiktenesiń.
San-saqqa júgirgen oıymdy telefon shyryly bólip jiberdi. Dosym eken, bılıardqa shaqyryp jatyr. Biraz sergip qaıtaıyn degen oımen kelise kettim. Syrtta qystyń qaqaǵan aıazy. Mashınammen qalany betke alyp júrip kelemin. Jol-jónekeı kólik jýatyn orynǵa kózim tústi. Solaı qaraı buryldym.
– Aǵa, munda kelińiz, bos oryn bar, – dep qol bulǵaǵan qara qyz aldymnan shyqty. Aıaǵyna rezeńke etik kıgen, beline oramal baılaǵan orta boıly, óńi jyly qyzdyń qımyldary shıraq. О́z isin meńgergeni kórinip-aq tur. Qystyń sary aıazynda mundaı jerde jumys isteý qyz bala emes, er adamǵa da ońaı tımeıtini anyq. – Munda istegenińe qansha ýaqyt boldy? – dedim.
– Úsh-tórt aıdyń júzi boldy, aǵa. Bul jumysqa da ıkemdele bastadyq, – dep jymıdy. Ári qaraı áńgimemiz sabaqtasa ketti.
– Basqa jumystyń yńǵaıy bolmady ma, sonda? Mynadaı sýyqta qolyńdy sýǵa sala bergeniń bolmaıdy-aý. Aýrýǵa shaldyǵyp júrme, – dep janashyrlyqpen óz oıymdy bildirdim.
– Ázirshe tapqan jumysym osy boldy, aǵa. Árıne, qıyny qıyn. Biraq, amal neshik. Ákem qaıtys bolǵan. Anam aıaǵynan júre almaıdy. Jalǵyz inim bar, mektepte. О́zim oqýǵa túse almadym. Jumystyń ońaıy joq ǵoı. Munyń bári ýaqytsha dep oılaımyn. Áli-aq jaqsy jumystar kezdesedi, – dep senimmen jaýap bergen qaryndasyma rıza boldym.
– Aǵa, nege júzińiz solǵyn. Bireý qatty renjitken sııaqty ǵoı sizdi, – dep júzime qarady. Shyny kerek, teledıdardan kórgen jańaǵy kórinister oıymnan áli shyǵa qoımaǵan edi. Nege, kimge renjigenimniń bárin ashyp aıttym álgi qyzǵa. Bir jaǵy onyń bul týraly pikirin bilgim kelgeni de ras. Áńgimemdi aıaqtaǵan soń, ol biraz únsiz kúıde qaldy. Qolyndaǵy sýlyqty shelekke bir matyryp, qatty-qatty syǵyp aldy da sózin bastady.
– Jaqsy bolý da, jaman bolý da adamnyń óz qolynda. Meni qynjyltatyn nárse, adamdar dúnıeqońyz, nápsiqumar bolyp bara jatqan tárizdi. Olar bárin aqshamen ǵana ólsheıdi, aqshamen ǵana sheshedi. Keıde maǵan da kólikterin jýdyrtýǵa ákemnen de úlken kisiler keledi. Keıbireýleriniń oıy buzyq. «Jaqsylap demalsaq qaıtedi, aqyńdy jemeımin», degen sózderdi estigende júregiń aýyrady. Talaı ret jylap ta alǵan kezderim boldy. Sonda olar aqshasy joq, álsiz jandar bárine kóne beredi dep oılaıtyn shyǵar. Biraq, qatty qatelesedi. Aqshaǵa satylmaıtyn qundylyqtar da bar. Olar – ar, uıat, namys. Eger osy qasıetter adam boıynda joq bolsa, onda jer basyp júrgennen ne paıda?! – dep kózine jas aldy.
Kólik jýýshy qyzben bolǵan áńgime de aıaqtaldy. Kirlegen kóligimdi sabyndy sýmen, kirlengen kóńildi ımandy sózdermen jýyp-shaıǵan qaryndasymmen «aman bol, ar-namysty tý etken qazaqtyń qyzy», dep ystyq peıilmen qoshtastym.
Seniń áli jolyń bolady. Men oǵan kámil senemin.
Bolat Májıt, jýrnalıst
ALMATY