Eleýsinov pen Dychko aqpan aıynda MJA Entertainment kompanııasymen kelisimshartqa qol qoıǵan. Ol kezde avstralııalyq promoýter Maık Altamýra qazaqstandyq boksshylardyń kásipqoı bokstaǵy debıýti mamyr aıynda Qytaıda ótetinin habarlaǵan.
Biraq 19 mamyrda Eleýsinov pen Dychko MJA Entertainment kompanııasymen aradaǵy kelisimshartty buzdy. Rıo Olımpıadasynyń chempıony Danııar áýesqoı boksqa qaıtyp oralýǵa múmkindigin de aıtyp qaldy. О́z kezeginde eki ret Olımpıada oıyndarynyń qola júldegeri atanǵan Ivan Dychkonyń áýesqoı boksqa oralar oıy joq.
Santos-Rossarıonyń sózine sensek, Eleýsinov pen Dychkonyń AQSh promoýterlerimen jumys isteýi múmkin. Buǵan deıin avstralııalyq menedjerler qazaqstandyq boksshylardy ataqty reseılik Sergeı Kovalevtyń bapkeri Santos-Rossarıo jattyqtyrady dep josparlaǵan.
"Alǵashqy promoýterlik kompanııamen kelisimniń iske aspaı qalǵany ras. Degenmen, jaqynda bir boksshyny Florıdadaǵy ujymmen kezdesýge aparǵan edim. Ol jerde bizdiń Olımpıada júldegerlerimizdiń jaǵdaıyn surady. Men bolǵan jaǵdaıdy menedjer Elvısý Krespoǵa túsindirdim. Endi kezdesýge kelisip otyrmyz.
Shynynda atalmysh kompanııa bizdiń birden olarǵa kelmegenimizge renishterin bildirdi. Búgin túste (amerıka ýaqytymen) Ivan men Danııardyń jaǵdaıyn talqylaıtyn jınalys ótedi", deıdi Santos-Rossarıo.
Ol sondaı-aq, kelissózder sátti aıaqtalǵan jaǵdaıda boksshylar birden jattyǵýǵa kirisip ketetinin málimdedi.
"Olardyń aıtýynsha, jattyǵýǵa birden kirisip ketedi. Eger bári sátti ótse, jigitter jospar boıynsha shilde aıynda kásipqoı bokstaǵy debıýtin ótkizedi. Árıne, bul jerdegi meniń úlesim boksshylardyń jekpe-jekke daıyn ekenin habarlap, qarsylasyna ruqsat berý", - deıdi Santos-Rossarıo vesti.kz basylymyna bergen suxbatynda.
Aıta keteıik, Eleýsinovke eki márte Top Rank Bob Arým promoýterlik kompanııasy kelisimshart usynǵan bolatyn. Bul kompanııanyń klıentteriniń qatarynda fılıppındik Mennı Pakıao, ýkraınalyq Vasılıı Lomachenko jáne amerıkalyq Terens Kroýford bar.
Aısáýle SEZBEK