Qazirgi tańda ǵylymı izdenisterdiń nátıjeli bolyp, óndiriske engizilip, ekonomıkanyń damýyna serpin berýi mańyzdy. Bul baǵytta joǵary oqý oryndarynyń materıaldyq-tehnıkalyq bazasyn nyǵaıtý qaıtarymdy bolmaq. Osyndaı ıgi qadamnyń biri olardyń janynan tehnoparkterdi kóptep ashý bolyp tabylady. Jaqynda el Táýelsizdiginiń 25 jyldyǵyna oraı S.Báıishev atyndaǵy Aqtóbe ýnıversıtetiniń janynan «Zerek» tehnoparki ashyldy. Jańa nysannyń saltanatty ashylýyna qatysqan oblys ákimi Berdibek Saparbaev qalada ashylyp otyrǵan tuńǵysh tehnoparktiń óńir úshin asa mańyzdylyǵyn atap ótti.
Aýmaq basshysy árbir memlekettiń damýy jańa tehnologııaǵa, ınnovasııaǵa, ǵylymǵa baılanysty ekenine, egemen elimizde osy kezeńde ǵylym men bilimniń qalaı damyǵanyna toqtaldy. Elbasy Nursultan Nazarbaevtyń aldymyzǵa damyǵan 30 memlekettiń qataryna ený maqsatyn qoıyp otyrǵanyna, ol úshin shet eldegi ozyq tehnologııalar men ınnovasııalardy ózimizdiń óndirisimizge, oqý prosesimizge engizýimiz kerektigine nazar aýdardy.
– Aqtóbedegi bes joǵary oqý ornynyń búginge deıin bireýinde de tehnopark bolǵan joq. Al búgingi ashylyp otyrǵan jańa nysan jastardy ǵylymǵa bastaıdy. Bul tehnopark ǵylym men óndiristi baılanystyrady. Buryn óndiriske engizilmegen jańalyqtar áýeli osy tehnoparkte qoldanylyp, saralanyp, odan keıin óndiriske engiziledi. Buǵan deıin osy ýnıversıtettiń janynan testileý ortalyǵy da salynǵan bolatyn. Búgin, mine, tehnopark saltanatty jaǵdaıda ashylyp otyr. Bul osy joǵary oqý ornynyń Táýelsizdigimizdiń 25 jyldyǵyna tartýy. Eger ár mekeme merekege osyndaı tartý jasasa, memleketimiz, órkendeı túsedi, – dedi ol.
Saltanatty jıynda ýnıversıtet prezıdenti, fılosofııa ǵylymdarynyń doktory, professor Bekejan Ahan jańadan ashylyp otyrǵan tehnoparktiń aldaǵy ýaqytta el ıgiligine qyzmet etetinin jetkizdi.
Tehnopark dırektory, tehnıka ǵylymdarynyń kandıdaty Nurlan Aldamjarovtyń aıtýynsha, búgingi kúni «Zerek» tehnoparkindegi úsh zerthanada professorlar, stýdentter men jas ǵalymdar jumys isteýde. Ol «Ǵylymdar qory» aksıonerlik qoǵamyna tórt baǵyt boıynsha konkýrstyq qujattaryn jibergenderin aıtty. Eger grant utyp alsa, aldaǵy ýaqytta ǵylymı jumystarmen aınalysýǵa mol múmkindik bolatynyn atap ótti.
Jańa ǵımarat tórt qabattan turady. Onda kitaphana qory men muraǵat, ǵylymı kitaphana, zerthanalar, akt zaly jáne jumys bólmeleri bar.
Satybaldy SÁÝIRBAI,
«Egemen Qazaqstan»