Qyzylordada oblys aktıviniń otyrysy ótti. Onda Memleket basshysynyń Qazaqstan halqyna arnaǵan Joldaýynda belgilengen basymdyqtar boıynsha aımaqty odan ári damytý máseleleri talqylandy. Qyzylorda oblysynyń ákimi Qyrymbek Kósherbaev óńirde sátti júzege asyrylǵan baǵdarlamalar jaıly baıandap, Joldaý basymdyqtarynan týyndaıtyn aldaǵy mindetterge keńirek toqtaldy.
– Memleket basshysy ekonomıkanyń tolyqqandy draıveri retinde qurylys sektoryn odan ári damytýdyń mindetin qoıyp otyr. Tıimdi turǵyn úı saıasatynyń nátıjesinde alǵash ret 2016 jyly Qyzylorda oblysynda jarty mıllıon sharshy metrden astam turǵyn úı salyndy. 15 myńǵa jýyq jer telimderine bir jarym myń shaqyrymǵa taıaý ınjenerlik júıeler tartyldy. Injenerlik-kommýnıkasııalyq ınfraqurylymdy tartý jónindegi aýqymdy jumystar kóp jyldardan keıin tuńǵysh ret oblys aýdandarynda da qolǵa alyndy.
Sondaı-aq, Elbasy aldymyzǵa eńbek ónimdiligin arttyrýdy mindettep otyr. Sońǵy jyldary biz óńdeýshi sektordy turaqty damytýǵa qol jetkizdik. 2016 jyldyń qorytyndysy boıynsha ǵana bul saladaǵy ósim 15 paıyzdy qurady. Eger ony 2012 jylmen salystyrsaq, ósim – 52 paıyz. Osy saladaǵy eńbek ónimdiligi 6 ese ósti. Nátıjesinde ónerkásip qurylymynda óńdeý sektorynyń úlesi 4 esege, al, aımaqtyq jalpy ónim qurylymynda 3,5 ese kóbeıdi. Biz qarqyndy tómendetpeýimiz qajet. Innovasııany qoldaý jáne olardy óndiriske jyldam engizý jańa ındýstrııany qalyptastyrýdyń mańyzdy sharty bolyp tabylady, – dedi Qyrymbek Kósherbaev.
Bilim berý jańa ekonomıkalyq ósýdiń ortalyq býyny bolýy tıis. Oblys ákimi mektepke deıingi bilim berý salasynda 3-6 jas aralyǵyndaǵy balalarǵa tárbıe men bilim berýdi tolyǵymen qamtý týraly Memleket basshysynyń tapsyrmasyn Qyzylorda oblysy 2015 jyly merziminen buryn oryndaǵanyn atap ótti.
– Buǵan óńirde memleket-jekemenshik áriptestigin damytýdyń arqasynda qol jetkizildi. Búgingi tańda oblystaǵy balabaqshalardyń 70 paıyzdan astamy osy júıemen jumys isteıdi. Eger de memleket 10 jyl ishinde 37 balabaqsha salyp berse, sońǵy úsh jyldyń ózinde jeke sektor 380-nen artyq balabaqsha ashty. Qyzylorda oblysynyń jaǵymdy tájirıbesin Memleket basshysy óz Joldaýynda atap ótti, – dedi ol.
Qyzylorda oblysynda strategııalyq qujattyń basqa da basymdyqtary boıynsha aýqymdy jumystar atqaryldy. Mysaly, bıznes ortany túbegeıli jaqsartý jáne keńeıtý aıasynda oblysta kásipkerlik úıi salynyp, bir aı buryn kásipkerlerge qyzmet kórsetý ortalyǵy jumysyn bastady. О́tken jyly kúrishten alynǵan rekordtyq ónim, óńdeý ónerkásibiniń qarqyndy damýy – aımaqtaǵy oń ózgeristerdiń aıqyn dáleli. Sonymen qatar, Joldaýda aıtylǵan birinshi basymdyq, ıaǵnı ekonomıkanyń jedel tehnologııalyq jańǵyrtylýy baǵytynda da óńirde naqty ister qolǵa alynǵan.
Aımaq basshysy Qyrymbek Kósherbaev jıyn sońynda Memleket basshysynyń Joldaýyn júzege asyrý boıynsha birqatar naqty tapsyrmalar júktedi.
Erjan BAITILES, «Egemen Qazaqstan»
QYZYLORDA