Atyraý oblystyq Sh.Sarıev atyndaǵy kórkemsýret jáne qoldanbaly-sándik óner mýzeıinde sýly-batpaqty jerler kúnine arnalǵan kórme ótti. «Aqjaıyq» memlekettik tabıǵı rezervatymen birlesken fotokórmede qoryqtyń basty erekshelikteri men bıoalýan túrliligi týraly aqparat berilgen.
Mýzeı basshysynyń orynbasary Jánibek Orynbasarovtyń aıtýynsha, sharany uıymdastyrýdaǵy maqsat – qorshaǵan ortany aıalaýǵa shaqyrý, ekologııalyq mádenıetti qalyptastyrý.
– Kórmege «Aqjaıyq» rezervatynyń sýdaǵy jáne qurlyqtaǵy ósimdikter toptamasy jáne janýarlar túrlerinen habardar etetin 40-tan astam fotosýret qoıyldy, – deıdi rezervat qyzmetkeri Nurgúl Orazǵalıeva.
Aıta keteıik, Jaıyq ózeniniń Kaspıı teńizine quıar atyrabyndaǵy aýmaqqa 2009 jyly «Aqjaıyq» memlekettik tabıǵı rezervaty ataýy berilgen edi. Erekshe tabıǵı keshende sırek kezdesetin jáne endemıkalyq sýdaǵy, qurlyqtaǵy ósimdikter toptamasy men janýarlar bar. Rezervat tabıǵı aýmaqty qorǵaýmen birge, ǵylymı zertteý jumystaryn, ekologııalyq aǵartý, týrızmdi damytý maqsatynda qyzmet etip keledi.
Baqytgúl BABASh, «Egemen Qazaqstan»
ATYRAÝ