Úkimettiń keńeıtilgen otyrysynda Memleket basshysy Nursultan Nazarbaev Úkimetke birqatar naqty tapsyrmalar bergen bolatyn. Nátıjesinde, senbi kúni ótken Úkimettiń kezekten tys otyrysynda Premer-mınıstr Baqytjan Saǵyntaev Ulttyq ekonomıka mınıstrligine bir aıda prosedýralardy odan ári jeńildetý boıynsha jumys júrgizýdi tapsyrdy.
Birinshi toqsannyń sońyna deıin túrli salalardaǵy tıptik jobalar tizimin keńeıtý jáne osy másele boıynsha óńirlerge tolyq ádistemelik qoldaý kórsetý tapsyryldy.
«Sonymen birge, Ulttyq ekonomıka mınıstrligi salalyq mınıstrliktermen birge ákimdikterdiń bıýdjettik ótinimderin qarastyrý kezinde MJÁ aıasynda iske asyrýǵa bolatyn jobalardy qabyldamaýy kerek», - dep basa aıtty B. Saǵyntaev.
Budan ózge, aldaǵy respýblıkalyq bıýdjetti naqtylaýǵa qatysty Úkimet basshysy qarjy mınıstri B. Sultanovqa osy kezeńniń ózinde osy qaǵıdalardy basshylyqqa ala otyryp, aldynda kelisilgen jobalardyń ózin qabyldamaýdy tapsyrdy.
О́z kezeginde Tımýr Súleımenov memlekettik-jeke menshik áriptestik (MJÁ) jobalarynyń barlyq oblysta birdeı deńgeıde damymaı jatqanyn rastady. Onyń pikirinshe, jergilikti atqarýshy bılik jarnamamen barynsha kóp jumys isteýi qajet. MJÁ-ti damytýǵa barlyq jaǵdaılar jasalýda.
Osy oraıda, 2016 jyly ortalyqtandyrý júıesi alynyp tastaldy, ol kezde MJÁ jónindegi sheshimderdi ortalyq deńgeıinde qabyldaý qajet bolatyn. Endigi quny 9 mlrd teńgege deıingi jobalar qandaı da bir kelisimsiz, jergilikti deńgeıde júzege asyrylady.
Budan ózge, MJÁ-niń mańyzdy nysandary boıynsha ınvestorlarǵa da, jergilikti atqarýshy organdarǵa da qajetti tıptik qujattar ázirlendi. Atalǵan tıptik qujattar aldaǵy áriptestiktiń barlyq erekshelikterin aldyn ala bilip alýǵa múmkindik beredi.
«Jergilikti atqarýshy organ da, ınvestor da ne nársege qol qoıyp jatqanyn naqty biletin bolady. Sáıkesinshe, sıpattamalardy, tehnologııalyq jáne ózge de syzbalardy jáne kelisimshart mindettemelerin bekitý sekildi uzaq úrdis qysqartylady. Bul ýaqytty aıtarlyqtaı deńgeıde qysqartýǵa múmkindik beredi», - dedi T. Súleımenov.
Birinshi toqsan aralyǵynda MJÁ qoldanylatyn barlyq sektordyń tıptik qujattaryn bekitý josparlanǵan.
Mınıstrlik «baǵdarlamalyq MJÁ» túsinigin engizýdi usyndy. Mınıstrdiń aıtýynsha, mundaı jobalardy barynsha standarttaý qajet.
«Mysalǵa, bizde shaǵyn balabaqshalar birdeı deńgeıde standarttalǵan «Balapan» baǵdarlamasy bar. Sony negizge ala otyryp, qarjylandyrýǵa, ınvestor men memlekettiń qatysýyna da osyndaı standarttaý jaǵdaıyn jasaýǵa bolady. Bul tolyq baǵdarlamaǵa aınalatyndaı etip standarttaýǵa bolady. Mundaı jaǵdaıda, JAO da, ınvestorlar da kelissózge túspeı-aq: tek shart jasasyp, qujatqa qol qoıyp, jumysty júzege asyrýǵa kirise beredi. Bul bizdiń bıyl bekitýdi kózdep otyrǵan ıdeıalarymyzdyń biri», - dep túsindirip ótti T. Súleımenov.
Barlyq ádistemelik kómek kórsetý men ilespeli túsindirý jumystaryn Ulttyq ekonomıka mınıstrligi júrgizýge mindetteledi.