Ortalyq kommýnıkasııalar qyzmetinde sý tasqyny kezine daıyndyqqa arnalǵan brıfıng ótti. Oǵan Ishki ister mınıstriniń orynbasary Iýrıı Ilın qatysty.
Jıynda ol kóktem kezinde el-eldi, jer-jerdi apatsyz ótkizý maqsatynda jergilikti atqarýshy organdardyń Ishki ister mınıstrligimen birigip sý tasqynyna qarsy aldyn alý sharalaryn atap ótti.
– «Qazgıdromet» RMK boljamyna sáıkes, erte kóktemde kún jylynsa Aqmola, Shyǵys Qazaqstan, Batys Qazaqstan, Qaraǵandy, Qostanaı, Soltústik Qazaqstan oblystarynda sý tasqyny bolýy múmkin. Sý tasqyny ortalyq jáne soltústik óńirlerde naýryz aıynyń sońy men sáýir aıynyń basynda bolatyn shyǵar. Sondyqtan biz qazirden bastap jergilikti ákimdiktermen jumys istep jatyrmyz, – dedi ol.
Osyǵan baılanysty 8,9 shaqyrym bógen jóndelip, 3,8 shaqyrym ýaqytsha bógey turǵyzylmaq. Al, 15,6 shaqyrym jaǵalaý aımaǵy qalypqa keltirilip, 24 shaqyrymdyq ózen arnalaryny tereńdetildi, avtomobıl men temir jol kópiriniń ótkizý qubyry tazartylǵan. Sonymen qatar, eldi mekenderdiń ákimdikteri 12,6 mln. m3 qar shyǵarǵan.
Iýrıı Ilınniń aıtýynsha, sý tasqynyn aldyn alý jáne joıý úshin 8 myń tonnadan astam kólemde JJM, 219 myń tonnadan astam ınertti materıaldar, 958 myń qap jáne 19,8 tonna jarylǵysh zat qory daıyndaldy.
Halyqty evakýasııalaý jaǵdaıyna 1707 qabyldaý pýnkt pen qajetti kólik aıqyndaldy. Evakýasııalanǵan halyqtyń tirshiligin qamtamasyz etý úshin ákimdikter qajetti quraldardy, tamaq ónimderi men aýyz sý qoryn daıyndady.
IIM sý tasqyny ahýalynyń kúrdelený jaǵdaıynda jalpy sany 12 myń adam, 2 myń tehnıka men 300 júzý quraldaryn daıyndady.
Dastan Kenjalın,
«Egemen Qazaqstan»