Maqsat – talanttarǵa qoldaý kórsetý

Qazaqstan Respýblıkasynyń Tuńǵysh Prezıdenti – Elbasy Qory men Bilim jáne ǵylym mınıstrliginiń qoldaýymen Qurmanǵazy atyndaǵy Qazaq ulttyq konservatorııasynda jyl saıyn joǵary oqý oryndary arasynda ótkiziletin respýblıkalyq pándik olımpıada bastaldy. Bıyl 9-ret uıymdastyrylyp otyrǵan respýblıkalyq olımpıadada 13 atalym boıynsha jıyny 180 daryndy jastyń tusaýy kesilmek. Dástúrli olım­­pıada 16 naýryzdan bas­ta­lyp, 21 sáýirge deıin jal­ǵa­sady. IH respýblıkalyq pán­­dik olımpıadaǵa elimizdiń shy­ǵarmashylyq pen ónerge baılanysty joǵary oqý orynda­rynda, ýnıversıtetterdiń mýzyka fakýltetterinde bilim alyp jatqan eń talantty stýdentter «О́ner», «Aspaptyq oryndaýshylyq», «Dırıjerlik (hor)», «Vokaldyq óner», «Dás­túrli mýzyka óneri», «Kom­pozısııa» jáne «Art-menedj­ment» boıynsha saıysqa túsip, baq synaıdy. Olımpıada bo­la­shaq mamandardyń kási­bı daǵdylaryn damytýǵa, oqý-ta­nymdyq qyz­metin yntalan­dy­rýǵa, sondaı-aq, talantty jas­­tardy tanyp, anyqtaýǵa arnalǵan. Olımpıadanyń ashylý saltanatynda sóz sóılegen Qur­manǵazy atyndaǵy Qazaq ult­tyq konservatorııasynyń rek­tory, Qazaqstannyń halyq ártisi Jánııa Áýbákirova: «Ta­lanttar tek oryndaýshylyq baǵytta ǵana emes, teorııalyq ja­ǵynan da sarapqa túsedi. Res­pýblıkalyq olımpıada kóp­tegen ónerli jastardyń bıikke kóterilýine qulshynys týǵyzyp, qoldaý kórsetti. Bizdiń basty demeýshimiz – Tuńǵysh Prezıdent Qory. Talantty jastardy, jas ǵalymdardy qoldaýǵa kel­­gen­de qordyń atqaryp ke­le ja­t­qan jumysy eresen. Konser­vatorııanyń ozat stýdent­teri tek olımpıada ǵana emes, qordyń arnaıy stıpendııa júldegerleri men túlekterimiz konsert ótkizý, albom shyǵarý, taǵy basqa jo­bala­ryna qoldaý tapty», dep atap ótti. Qazaqstan Respýblıkasynyń Tuńǵysh Prezıdenti – Elbasy Qory atqarýshy dırektorynyń orynbasary Sergeı Tohtarov ta synaqtyń mańyzdylyǵyna toqtala kelip, talaby zor talant­tardyń qadamyna sáttilik tiledi. Olımpıadanyń ashylý saltanatynda «Turan», «Hassaq» folklorlyq-etnografııalyq an­samblderi, Eldar Aıtbekov jáne Maqsat Nurlanov sııaqty vıolon­chelıster dýeti, Iаn Rýd­kovskııdiń dırıjerligindegi kon­servatorııanyń aralas hory jáne respýblıkalyq olım­pıa­dalardyń laýreattary, dombyrashylar Abylaı Tilep­ber­genov, Tańat Sadenov, dırıjer Kemeń­ger Qadyrbekov, ánshi Aıbek Qanatbek qatysyp, óner kórsetti. Aıgúl AHANBAIQYZY, «Egemen Qazaqstan» ALMATY