О́tken jyly Nadejdınniń úsh turǵyny aýyl syrtyndaǵy ormanǵa sańyraýqulaq terýge barady. Qaıyńdy ormanǵa kirisimen bir jaǵymsyz ıisti sezedi. Olar bir aǵashtyń túbinde ólip jatqan elikti kóredi, ólekse aını bastapty. Ony aýdarystyryp kóredi, terisinde oqtyń izi bilinbeıdi. Tımýr aýyldastarynyń aldyna túsip, on-on bes metr júre bergende ábden áljýazdanyp, demin zorǵa alyp jatqan eliktiń laǵyn taýyp alady. – О́lgen eliktiń laǵy eken, áli kindigi de túsip úlgermepti, áljýaz, aıaǵyn basa da almaıdy. Men dereý úıden ákem men aǵamdy shaqyrdym. Olar sol sátinde jetip keldi. Al biz laqty ákelgenshe, anam emizik pen shólmekke sút jylytyp quıyp, daıyndap otyr eken, – deıdi Tımýr. Alǵashqy kúni eliktiń laǵyna sút berý de ońaı bolmapty. Ol emizikti aýzyna almaǵan soń, sútti laqtyń aýzyna qasyqtap tamyzǵan. – Osyndaıda ınternet «jedel járdem» sekildi, aqtarsań bárin bile qoıasyń, áıtpegende laqty óltirip alýymyz da múmkin edi, – deıdi Vıtalıı Sıdorov. – Internetten elik laǵyn mysyq, ıt sekildi bir búıirinen jatqyzyp emizetinin bildik. Biz de solaı sút berdik. Sútti on gramnan bastaǵan laq, bir aptada onyń bir shólmegin iship alatyn boldy. Ár tórt saǵat saıyn bir shólmek sút iship turdy. Odan keıin otyǵa bastady, shóp, jemge de úırendi. Sıdorovtar otbasynda ul men qyz ósip keledi. Tımýr qazir segizinshi, Polına tórtinshi synypta oqıdy. Olar eliktiń laǵyna Dasha dep at qoıdy. Dasha balalardyń shaqyrǵanyna júgirip keledi, Tımýr men Polınany mektepke deıin shyǵaryp salyp, keshke «kútip» alady. О́tken jyly Nadejdın mektebinde Tımýrdyń bıologııa pániniń muǵalimi Svetlana Álibaevanyń jetekshiligimen jasaǵan «Aýyldaǵy jabaıy elik» atty ǵylymı jobasy aýdandyq bilim baıqaýynda ekinshi oryn aldy.
Názıra JÁRIMBETOVA, «Egemen Qazaqstan»
Qostanaı oblysy, Qarabalyq aýdany, Nadejdın aýyly