Jumys tobynyń jetekshisi, A.Baıtursynuly atyndaǵy Til bilimi ınstıtýtynyń dırektory E.Qajybek jetekshilik etken jıynǵa QR UǴA prezıdenti, akademık Murat Jurynuly, professor Baıynqol Qalıev, saıasattanýshylar Dos Kóshim, Aıdos Sarym, professor Álimhan Júnisbek, QR UǴA korrespondent-múshesi, professor Zeınep Bazarbaeva, professor Jumaǵalı Ábýov, professor Tanat Aıapova, professor Quralaı Kúderınova, basqa da komıssııa músheleri (tizim boıynsha) jáne Instıtýttyń ǵalymdary men magıstrant-doktoranttary qatysty. Jıynda QR Ulttyq ǵylym akademııasynyń prezıdenti, akademık Jurynov Murat Jurynulynyń latyn álipbıi jaıly baıandamasy;Abylaıhan atyndaǵy Qazaq halyqaralyq qatynastar jáne álem tilderi ýnıversıtetiniń professory, fılologııa ǵylymdarynyń doktory Qalıev Baıynqol Qalıulynyń latyn álipbıi týraly baıandamasy tyńdalyp, talqyǵa tústi.
Jumys tobynyń quramynda latyn álipbıiniń nusqalaryn retteıtin, saraptaıtyn, júıeleıtin komıssııa quryldy. Osyǵan oraı, latyn grafıkasyna negizdelgen jańa álipbıge qatysty barlyq usynystar erekshelikterine sáıkes toptastyrylyp, jan-jaqty taldanyp, jumys tobynyń aldaǵy otyrystarynda talqylanatyn bolady. Qazirgi ýaqytta jumys tobynda kompıýter, IT jáne elektronıka, aǵylshyn tili mamandarynyń, túrkitanýshy, sondaı-aq qazaq tili ǵalymdarynyń, sheteldik qandastardyń, Parlament depýtattary tarapynan t.b. qalyń jurtshylyqtan kelip-túsip jatqan usynys jobalary bar.
Usynylǵan jobalar belgilengen ǵylymı talaptarǵa sáıkes bolǵan jaǵdaıda arnaıy derek qoryna engiziletin bolady.
Baǵashar TURSYNBAIULY,
«Egemen Qazaqstan»,
ALMATY