Keneler adam ómirine asa qaýipti jándik sanalady. Tipti, adam ólimine ákelip soǵýy da ǵajap emes. «Elimizde 3 otrıad tarmaǵyna jatatyn akarıformdy, parazıttiformdy jáne az zerttelgen pishendik kenelerdiń 10 tuqymdasy, 58 týysy, 236 túri kezdesedi», deıdi mamandar. Ásirese, jańbyrdan keıin taýly aımaqtarda, kógaldy jerlerde jıi beleń alady. Adam men janýarlardyń, sondaı-aq, ósimdikterdiń parazıti bolyp tabylatyn jándik adamǵa bórtpe, súzek, kene ensefalıti, týlıaremııa sııaqty aýrýlardyń órbýine jol ashady. – Qala qonaqtary men turǵyndary taýly aımaqtarǵa demalysqa shyqqanda qaýipsizdik sharalaryn nazardan shyǵarmaǵany abzal. Demalystan keıin ústi-basyn qaǵyp, kene sııaqty jándikterdiń jabysyp almaǵanyna muqııat kóz jetkizý kerek. Kóktem mezgilinde tek kene ǵana emes, túrli juqpaly aýrýlardyń oshaǵy sanalatyn kemirgishter de kóbeıedi. Almaty qalasynyń aýmaǵy boıynsha zalalsyzdandyrý jumystarynyń kóktemgi naýqanyn bastadyq. Jappaı zalalsyzdandyrý jumystaryna quramynda epıdemıolog dárigerleri bar 36 adamnan turatyn 6 brıgada jumyldyryldy. Sondyqtan, barlyq turǵyndardy úı aýlalary men qoǵamdyq oryndarda, demalys oshaqtarynda sanıtarlyq tazalyq saqtaýǵa shaqyramyz, – deıdi Almaty qalasy boıynsha dezınfeksııa ortalyǵy fılıalynyń basshysy Esen Bekbosynov. Qyshyma kene sııaqty kenelerdiń keıbir túri kózge de ilinbeıdi, ony tek ulǵaıtqysh áınekter arqyly ǵana kóre alasyz. Mundaı kenelerdiń alǵashqy belgileri adam terisine enip, denesin qyshytady. Osyndaı jaǵdaıǵa kezikseńiz, ózińizge nemquraıly qaramaı birden dárigerge júgingenińiz durys.
Arman OKTIаBR, «Egemen Qazaqstan»
ALMATY