Maıra MUHAMEDQYZY: «Sheteldegi meniń ekinshi atym. Ol – Qazaqstan!»

Táýelsizdik qandaı tátti, kıeli sóz deseńizshi. 1991 jylǵy 16 jel­toq­san – Qazaq eli ǵasyrlar boıy ań­saǵan Táýelsizdigine qol jetkizgen, tórtkúl dúnıege jar salyp, ala­qaı­lap súıinshi suraǵan tarıhı da qa­sı­et­ti kún. Bul – kózaıym habar ju­myr jerde shashylyp júrgen ıisi qazaqtyń da júregine úmit otyn jaqqan kún. О́zderiniń qazaq bolyp týǵandaryna qýanǵan ba­qytty kún. О́ıtkeni, árkimniń týǵan jeri, týǵan otany ózine jeruıyq. Mine, sol ýaqyttan bastap shettegi qan­dastarymyzdyń tarıhı Otanyna uly kósh-kerýeni bastaldy. 1994 jy­ly sol kósheli kóshpen kóship kelgen aǵaıyndardyń arasynda búginde Qazaqstan Respýblıkasy­nyń eńbek sińirgen ártisi, Memlekettik syılyqtyń laýreaty, Qazaq­tyń memlekettik Abaı atyndaǵy akade­mııa­lyq opera jáne balet teat­ry­nyń ánshisi Maıra MUHAMEDQYZY da bar edi... – Maıra Muhamedqyzy, esińizde me, sizdiń Respýblıka saraıynda ótken tuń­ǵysh konsertińizge at arytyp sonaý As­panasty elindegi ata-ana, baý­yr­la­ryńyz da kelgen-di. Mine, sol keshtegi úziliste ana­ńyz Kamal Qýanyshqyzyna joly­ǵyp, suhbattasýdyń sáti túsken bolatyn. Sonda anańyz: «...Balamnyń konserti óte­di degen soń Qytaıdan ar­mandaǵan qa­zaǵymnyń jerine kelip, qyzymnyń úl­ken sahnada án shyr­qa­ǵanyna júregim jarylardaı qýanyp turmyn. Balapa­nym­dy baýyrlaryna ba­syp, qushaǵyna alǵan meıirimdi hal­qy­ma, ony basqaryp otyrǵan Elbasy Nur­sultan Nazar­baev­tyń kórsetip otyr­­ǵan qamqorlyǵyna basymdy ıip, rahmetimdi aıtamyn», dep edi. Odan keıin de tamasha tabysqa qol jetkizdińiz. Memlekettik syılyqqa ıe boldyńyz. Árıne, eń aldymen balasy alaman báıgeden oza shaýyp kelip jatsa, tileýin tilep otyrǵan ata-ana úshin bir ǵanıbet sát, úlken qýanysh, zor maqta­nysh emes pe... – Iá, ata-anamnyń qýanyshynda shek joq edi. Ol kezde ákem tiri, meniń osy qýanyshymdy kórip ketkeni úshin Allaǵa myń razymyn. «Balam, bul jeńisiń eń aldymen, táýelsizdiktiń qudireti, táýel­sizdiktiń arqasy. Sol táýelsizdikti baıandy etip, eldiń eńsesin kóterip, baryn-joǵyn túgendep, basqa eldermen terezemizdi teń ustap otyrǵan Elbasynyń jankeshti eń­beginiń arqasy. Qarǵadaı kezińde Otanym, elim-jurtym dep kelgende shetke qaqpaı, seniń ónerińdi baǵalap, kórsetken qam­qor­lyqtyń, halyqtyń ónerge degen peıiliniń arqasy. Endeshe, bul syılyqtyń artynda úlken salmaǵy bar. Iаǵnı, el aldyndaǵy jaýapkershiligiń burynǵydan júz eselendi degen sóz. Osy bıiktikten túspeı, odan ári de eńbektenýiń kerek», degen edi. Anamnyń sózine qosarym, júregimmen de, kóńilimmen de aıtarym, Allaǵa da, Qa­zaqstanǵa da rızamyn. – Umytpasam, siz sol Memlekettik syılyqqa ıe bolǵanyńyzda shetelde júrgen edińiz. Súıinshi habardy estigende qandaı kúıde boldyńyz? Buǵan qo­sa, birneshe halyqaralyq syılyq­tar­dy aldyńyz. Aıtyńyzshy, siz úshin sol syılyqtardyń ara salmaǵy, aıyr­masy qanshalyqty? – Aıtary joq… Elimizdegi eń már­tebeli – Memlekettik syılyqtyń maǵan buıyrǵany týraly habardy estigendegi kóńil-kúıimdi jetkizý múmkin emes shy­ǵar. Boıyma qanat bitip ushyp keterdeı bol­­dym. Sondaı bir keremet baqytqa bólep jiberdi. Dál sol kezde Fransııanyń Týlon qalasyndaǵy Ulttyq opera teat­ryn­da ótip jatqan spektaklde oınap jatqanmyn. Úzi­liste áriptesterime jetkizip edim, bar­lyǵy qýanyp, quttyqtaǵany este. Spek­takldiń ekinshi aktisin sondaı bir erekshe shabytpen oryndap shyqtym. Osy qýa­nyshymdy bólisýge, ári óz elinde ánshisin qalaı qarsy alyp, baǵalaıtynyn kórsin degen oımen teatr dırektory men jeke menedjerimdi Táýelsizdik toıyna, syılyqty tapsyrý rásimin kórýge ertip keldim. Bul men úshin ómirimdegi eń qym­bat marapat dep bilemin. О́ıtkeni, halyq­aralyq baı­qaý­larda jeńimpaz ataný bir bólek te, óz elińde eńbegiń janyp, seni qoldap, qol­pashtaǵan, seni baǵalaǵan qýanyshty seziný odan da erekshe, odan da áserli de ystyq, júregińe jaqyn eken. О́zim ǵana emes, menimen birge el de qýandy. Internettegi jáshigim sondaı quttyqtaýlarǵa tolyp ketti. Eń qýa­nysh­ty­sy, atamekenge kelgen oral­mandar ara­synan óner salasynda jo­ǵary syılyqqa ıe bolǵan jalǵyz qazaq­pyn. Endeshe, bul sonaý eki ókpesin qo­lyna alyp týǵan Otanyna jetken aǵaı­yn­darǵa da berilgen marapat dep bilemin. – Maıra Muhamedqyzy, sizdiń tarıhı Otanyńyzǵa oralǵanyńyzǵa da attaı on jeti jyldan asypty. Sol týǵan jer dep ańsaryńyz aýyp kelgende Otanyńyz sizge ne berdi? – Bárin berdi. Eń aldymen, ári eń bastysy – Qazaqstan maǵan erkindik berdi. Qazaqstan degende túsinetinim – Táýel­siz­dik, qarapaıym sózben aıtsaq – bostandyq. Qarańyzshy, sol bostandyqqa qanshama ult kúresip jete almaı jatyr. Sol er­kindiktiń bolmaýynan taǵdyrlary ózgerip, otanynyń joqtyǵynan ómirde de, ónerde beıshara bolyp júrgender qan­shama. So­lardy kórip, Allaǵa myń shú­kir­lik ja­saı­syń. Eger Qazaqstanǵa kelmegende, múmkin osylaı án sala almas pa edim dep oı­laımyn. Olaı deıtinim, Qytaıda júrgende bala kezden armandaǵan Chaıkovskıı atyn­daǵy dúnıejúzilik baıqaýǵa qatysýǵa bel býdym. Oǵan bes ánshi qa­ty­satyn boldyq. Qytaı úkimeti tarapynan eki ánshi qytaı ultynan, qalǵandary óz qarajatymen bar­syn degendi estigende, júregim qan jy­lady. Ondaı múmkindik qaıda? Ustazym professor Go Shý Djen: «Men eki qytaı ánshisin daıyndaımyn, saǵan qolym tı­meıdi. Shákirtim retinde aıtarym, qatys­qyń kelse, Qazaqstanǵa bar. Ondaǵy myq­ty oqy­týshylardyń deni Máskeý, Lenın­grad­taǵy orys mektebiniń túlekteri, sonda baryp daıyndal, sol jaqtan jolyń bolar», dep keńes berdi. Árıne, men eki eldiń mádenıetimen, eki eldiń dástúrimen óstim. Osyǵan deıin 5 myń jyldyq tarıhy bar Qytaıdyń mádenıeti, tárbıesi, mektebinen ótip, jaq­sy-jamanyn kórdim. Ol bir alǵashqy shyńdalý mektebi boldy. Biraq Qa­zaq­stan­ǵa kelgen soń túpki sanamdaǵy adamǵa kerek erkindikti sezindim. Shek­ara­ny óte bastaǵanda ushy-qıyry joq keń dalany kórip, tynysym ashylyp sala bersin. Keldim. Kórdim. Qıyndyq ta boldy. Me­niń qınalatynym, keıbir otandas­ta­ry­myz Táýelsizdiktiń, erkindiktiń ne ekenin bilip, túsinip jatpaıtyndaı kórinedi. Qy­taıda, árıne, mende ondaı sezim bolǵan joq. О́ıtkeni, ár memlekettiń óz saıasaty, óz dástúr-salty bar demekshi, kópti kór­genmen, ishki erkindikti sezinbeıtinsiń. Qazaqstan Táýelsizdigin alǵan kezdegi on­daǵy aǵaıyndardyń qýanǵanyn aıtpańyz. Men sol erkindikti izdep keldim. 1994 jyly týǵan topyraqqa aıaq basyp, Ota­nymyzǵa oraldyq. Sodan bergi 17 jylda qazaǵymmen, elimniń tarıhymen birge ósip kele jatqanymdy maqtanysh sezimmen aıta alamyn. Qazir tipti Qytaıda tý­ǵanymdy umytyp kettim. Qaıda baramyn deımin, baramyn. Erkin sóıleımin, erkin pikirlesemin, emin-erkin óleńimdi aıta­myn. Maǵan bir adam tosqaýyl qoıa al­maıdy. О́ıtkeni, derbes tulǵamyn. Ol – sol erkindiktiń arqasy. Mine, sony ár­qaısymyz túsine bilýimiz, sol erkindikti qorǵaýymyz kerek. Atameken – seniń máńgilik qaıtar mekeniń, aınalyp keler temirqazyǵyń. Mine, sol táýelsizdigimizge bıyl jıyrma jyl tolyp otyr. Qaı zamanda da, qaı ýaqytta da adamzat balasy úshin táýelsizdikten asqan qudiretti sezim bolmaǵan. Toıdyń da tóresi – osy Táýelsizdik toıy. – О́ner joly qıyn jol. Adamzat taǵylymynda ataqty, belgili adam­dar­dyń ómirine erekshe silkinis ákelip, ómirine áser etken, bolmasa ózin osy deńgeıge jetkizgen adamdarǵa degen yqy­las, nıeti ózgeshe bolyp jatady. Bylaısha aıtqanda, ómir boıy qa­ryz­dar bolyp ótetin adamdary bolady. Osy turǵydan alǵanda, kimniń aldyn­da ózińizdi boryshtar sezinesiz? – Eń aldymen, qazaq bolyp týǵanym úshin halqyma qaryzdarmyn. Odan keıin ata-anama. Baqytym shyǵar, ónerli otba­synda dúnıege kelip, tárbıelendim. Ákem Muhamed Ábdiqadyruly mýzykant, ári kompozıtor, al anam 40 jyl sahnada án salǵan Qytaıdyń birinshi dárejeli ártisi, bizdiń ólshemmen halyq ártisi boldy. Qazaqtyń kim, qandaı ekenin, kóbine anam oryn­daı­tyn halyq ánderiniń qasıetinen, sózinen, nárinen topshylap óstim. Bul osy elge degen arman, qushtarlyǵymdy kú­sheıte tústi. Úshinshiden, taǵdyryma kezikken, baýlyǵan ustazdaryma qaryzdar­myn. Árıne, óner joly aýyr da, qıyn jol. Osynda kelgen soń qalaı ómir súrip, ónerimdi qalaı jal­ǵastyramyn degende ıgi jaqsy adamdarǵa keziktim. Al úlken baıqaýlarǵa qatysý úshin qajymas qaırat, jigerińmen qatar, qoldaý da qajet. Bú­gingideı jetistikterge jetip, birden-bir úlken sahnalarǵa shy­ǵý­ym­da Elbasy Nur­sultan Nazarbaevtyń eńbegi zor. Son­dyqtan da, odan keıin kimge qaryzdarsyz dep surasańyz, Elbasyna qaryzdarmyn dep aıtar edim. 1997 jyly Portýgalııaǵa baıqaýǵa ba­ryp kelgen soń alǵash ret ol kisiniń al­dynda sahnaǵa shyqtym. Zerektigi, talant­ty tanı biletin qasıeti shyǵar, sol joly: «Bul qaı bala?» dep surastyryp, jaǵ­daıymdy bilipti. Ol kezde shetelden kelgen qazaqtarǵa azamattyq alý óte bir qıyn sharýa edi. Sóıtip, eki jyl ala almaı júrgen azamattyǵymdy, oǵan qosa páterdiń kiltin óz qolymen tabys etti. Al basyńda baspanań bolmasa, búkil zeıi­niń­di qoıyp, birdeńege qol jetkizý múmkin be? Mine, sodan bastap jolym ashyldy. – Maıra, siz qazaq opera ánshi­le­ri­niń arasynan shetelde kelisim-shartpen jumys istep júrgen sanaýly ánshi­niń birisiz. Olardaǵy ónerdiń deńgeıi, baǵa­lanýy qalaı eken? Neni baıqap, neni túıip júrsiz? – 2002 jyly taǵy bir úlken jetistikke jettim. Fransııaǵa kelisim-shartpen ba­ryp, jumys isteıtin boldym. Onda óz ónerimdi tanyta júrip, alpaýyt el – Ame­rı­kanyń úlken sahnasyna joldama al­dym. Úlken-úlken óner adamdarymen birge júrdim. Biraq, adam syrtta júrgende jalǵyzdyqty qatty sezinedi eken. Degenmen, halyqtyń maǵan degen kóńil-kúıi, úmiti, senimi, bergen aq batasy bóten elde rýh, kúsh berdi. Munyń bárin táptishtep aıtyp jatqanym, júregi názik óner adamyna kishkene ǵana qoldaý, osyndaı bir aýyz jyly sóz úlken shabyt ákelmek. Ras, syrttaǵy óner joly ońaı emes. О́ıtkeni, shetelde sahnaǵa qazaǵymnyń aty menimen birge shyǵady ǵoı. Qazirdiń ózinde meni kim dese – bári «Qazaqstan» deıdi. Sondaıda odan beter jaýapkershilikti eseleısiń. – Ádette óner adamdary talant 1 paıyz, eńbek 99 paıyz dep jatady. Sol sózge qalaı qaraısyz? – Iá, qudaıdyń beretini bar da, eńbek, ýaqyt, tájirıbemen keletini de bar. Qazir men kez-kelgen sahnadan – ol úlken be, kishi me, qoryqpaımyn. О́ıtkeni, Qytaıdyń da, keńestiń daý-damaıy kóp sahnasyn da kórip, shyńdaldym. Qazaqtyń da, qytaı­dyń da ánin aıtyp, kez kelgen stıldegi kásipqoılardyń aıtqanynyń bárin qaǵyp alyp, meńgerdim. Nege deseńiz, sol tá­ji­rıbeniń bári jınalyp, adamdy bir satyǵa shyǵarady. Sony uǵynǵanda ónerdiń qan­sha­lyqty qıyn jol ekenin bilesiń. Qytaıda Úrimshi qalasynda júrekke operasııa jasaıtyn qazaq jigiti bar. Sol júrekke jasaǵan operasııasyna 99 paıyz bolmasa da, 90 paıyzyna kepildik beremin dep otyrady. Al júrekke ekiniń biri ondaı kepildik bere almaıdy. Kúndelikti ınternet arqyly AQSh-tan, basqa elderden «anany qalaı jasaý kerek, mynany qalaı jasaý kerek» dep suraıtyn kóri­ne­di. Onyń qupııasy sol, kúnine ár on mınót saıyn bir operasııa jasap, qoly úırenip, mashyq­tanǵany sonshalyqty, ári ońaı, ári tez bolatyn ádis-tásilin taýyp alǵan. So­nyń nátıjesinde toqsanǵa kelgen qarııaǵa da jasaı beredi. О́ıtkeni, óz kásibin óte jaqsy biledi. Mine, munyń bári táji­rı­be­niń arqasynda kelip otyr. Artyna tús­ken­dikten, sonyń shyńyna jetken. О́ner­de de sol sııaqty. Meniń baıqaǵanym, Alla taǵala ózi talant bergenmen, jalqaý­lyqty qosyp jiberetin kórinedi. Al ony tabandy bolsań ǵana jeńesiń. Kóp adam­nyń jete almaı jatatyny sondyqtan bolsa kerek. – Onyńyz ras, jalpy jalqaýlyq qazaqtyń qanynda bar ma deımin. Ony tipti ómir súrý saltymyzdan da, jeıtin tamaq, júris-turysymyzdan da baı­qaý­ǵa bolatyn sııaqty. – Menińshe, ol tárbıege de kóp baı­la­nysty. Ata-anamnyń sanamyzǵa sińirgeni, balam dúnıedegi eń qasıetti nárse – ol úırený. Qazir anamnyń jasy kelse de, kitapty syǵyraıyp oqyp, oryssha úıre­nip alaıyn deıdi. Qazaqta «bolar bala ...» degen sóz týra aıtylǵan. Ata-anamnan estigen sózdiń bári ras bolyp shyǵady. «Bilegi bar birdi, bilimi bar myńdy jyǵady», «Bilgenge bir toǵyz, bilmegenge toqsan toǵyz»... Keıin oılasam, bári ras. – Maıra Muhamedqyzy, sizdiń óner­diń ishindegi tańdap alǵan salańyz, kúr­deli klassıkalyq janr – opera. Osy janr jónindegi tujyrymyńyz qandaı, onyń kúrdeliligi nede? – Birinshiden, búkil múmkindikti beretin eńbek ekenine kóz jetkizdim. Iаǵnı, múmkindik – ol eńbek. Múmkindik joly­ńyz­dy ashady, eńbektenseń ǵana, onyń rızyǵyn kóresiń. Basqany bilmeımin, ózim sahnany súıip týǵan ekenmin. Sah­naǵa shyǵýǵa asyǵamyn. Kóp ánshiler sahnadan qorqatyn sııaqty. Árıne, tolqı­syń, tolǵanys bolady degendeı. Ol qan­daı jaǵdaıda bolady? Sen daıyndalma­ǵan, ózińdi daıyn emespin dep sezingen shaqta. Pispegen, shala bolǵanda qorqy­ta­dy. Al saqadaı saı kezińde baryńdy sa­lyp aıtqan sahna – sol kıeli sahna. Ne úshin kıeli degende – sahnany súıip, so­ǵan taǵzym etkenińde ol seniń bar múm­kin­digińdi ashady. Eger buryn el aldyna «joǵary notany ala almaı qalsam, qaı­temin?» dep qorqyp shyqsam, qazir olaı emes, sahnada senimdimin, batylmyn, erkinmin. Sahnany jaqsy kóretinim son­sha­lyq, kishkene balalar sııaqty konsertke shyqqansha asyǵyp, soǵan jetkenshe qu­mar­lanamyn. Buryn konserttiń aldynda qobaljyp, uıyqtaı almasam, endi «qashan konsert bolady, daıyndaǵanymdy qashan aıtamyn» dep jaqsylyqqa asyqqandaı taǵatsyzdana kútemin. Minekı, kórdińiz be, sonda bizge jetispeıtini senim eken. Men sol senimdi tapqan sııaqtymyn. – Shetel sizge taǵy ne berdi? Ne úırendińiz? – Shet el maǵan qalaı ómir súrýdi úı­retti. Jańa aıttym ǵoı, shetelde tynbaı jumys istep, ózińdi, talantyńdy kórsete alasyń, soǵan qaraı ómir súresiń. Al onyń bári – kúres. Men sol kúrese bilýdi úı­ren­dim. Al kúresý – qyzǵaný, bireýge ja­man­dyq oılaý emes. Bul – naǵyz óner jo­lyn­daǵy kúres. Ol – basqalarmen emes, óziń­men kúresý. Mine, sol qasıetti eýropa­lyq­tardan úırendim. Olar eshkimnen eshnárse qyzǵanbaıdy. Árkimniń ózi­niń saǵaty mı­nótyna deıin jazylyp turǵan kelisim­shar­ty bar. Eshkim senimen talaspaıdy, eseptespeıdi. Tek agentiń ju­mys isteıdi, ol ta­labyńa, kásibı she­ber­ligińe, kelisimshart­tyń azdy-kóptigine baılanysty. Endigi jer­de sol jaýapkershilikti abyroımen at­qara alasyń ba, má­sele sonda. Qazaq ony uıat bolyp qalma­syn dep jatady. Iаǵnı, Qazaqstannyń, bú­kil bir memlekettiń aty­nan kelip tur­ǵan­nan keıin uıat bolmasyn, basqalar jetken jetistikke nege jetpeımin, nege jasqa­na­myn dep baryńdy sala­syń. Ol bireýdi qyzǵanyp, baǵyn kesý, jamandyq oılaý emes. –Taza ónerdiń báıgesi demeksiz ǵoı... –Iá, taza ónerdiń báıgesi. Ondaı kezde jańaǵy qyzǵanysh, basqa oılar túkke turmaı qalady. Men tabıǵatymnan adam­dy qyzǵanbaımyn. Al qyzǵanysh ár adamda bolatyn nárse. Adamnyń qolynan keletin nárseni ol isteı alsa, saǵan nege istemeske. Tek qana ózińniń jumysyńdy bil. Iаǵnı, ózińdi bilip basqara bilseń, óner­diń aldynda aryń taza bolady. Bir aıta keterligi, bizdiń qazirgi óner­de, ásirese, klassıkada álemdik deńgeıge kóterilgen óner ıeleri saýsaqpen sanar­lyq. Sol top tezirek kóbeıse eken deımin. О́ıtkeni, Astanada opera teatry salyný­da, oǵan jaqsy rejısser, ánshiler kerek. Ony kim isteýi kerek? Jastar. Al kóp­shi­liginde sol jastardyń jaǵdaıy túzelgen joq. Jalaqy kóterilip jatyr, biraq áli de az. Az bolǵan soń, olar eki-úsh jumys­qa bólinedi. Al taza óner adamy jalaqy, basqa nárselerge kóńil bólmeı, tek qana án aıtýǵa tıispiz. Búginde sondaı dáre­jege jetken Jánııa, Aıman, Maratpen maqtanamyz. Biraq, olar az. Ol úshin talant tárbıeleýimiz qajet. Bizdiń teatrda jańa operalar qoıýǵa bas, barıton, tenr jetispeıdi, kópshiligi áıelder. Al talanattar qaıda? Aýylda. Solardy injý-marjandaı talmaı izdegenimiz abzal. Al bar degen kóp talanttyń materıaldyq jaǵdaıy joq. Qytaıdyń bir jaqsy jeri, talantty kórip qalsa, qaıdan bolsa da julyp ákelip, oqytady. Tipti, Italııaǵa jiberedi. Kóp qytaı qazir Italııada oqyp jatyr. Sebebi, operanyń bastaý jeri, bu­laqtyń kózi – Italııa. Bizdiń ónerdegi kele jatqan urpaǵymyz jalǵasyn tabýy kerek. Qarap júremin, konsertke baryp tyń­dap júremin, bir-ekeýi bar. Biraq, olar­­ǵa qol­daý joq. Ne úı, ne kúı joq. Olar bir kún aıtsa, bir kún aıtpaıdy. Al taza óner sońyna túskende ǵana jemisin beredi. Taǵy da sheteldikterge tánti bolǵa­nym, olardyń árqaısysy óz eliniń par­tıottary. Máselen, amerıkalyqtar óz tý­yn qalaı qurmetteıdi. Qudaıǵa qatty senedi, ári adamǵa jaqsylyq jasaý kerek dep turady. Sonan keıin Otanyna degen súıispen­shiligi. Oıpyrmaı, deseńizshi! О́zi­niń týyn maıka, shalbar etip kıip ala­dy. Mysaly, men «Kók týy jelbiregen» degen ánge elime degen súıispenshiligimdi bildireıinshi dep, konsertimde ekranǵa El­basynyń júrgizip kele jatqan saıasa­tyn kórsetetin beınefılm jasap, Kók týdy sahnaǵa gvardııa sarbazdarymen al­yp shyǵamyn degende maǵan kóp adam qar­sy turdy. «Bulaı jasaıtyn sen kimsiń?» dep rejısser ekeýmizge pále saldy. Sonda qatty qapa­landym. Biraq, túsinetin adamdar sol ándi dál solaı aıtqanda jylap turdy. «Maıra, jaraısyń!» degender kóp boldy. Sol kezderi Qazaq­standa Týdy sahnaǵa alyp shyǵyp aıtqan ánshi men ǵana shyǵarmyn. Mine, sol arqyly halyqqa degen mahab­ba­tymdy, ózimniń erkin eldiń azamaty ekenimdi kórsettim dep oılaımyn. – Áńgimeńizge kóp rahmet. Alar asý­la­ryńyz, shyǵar asqarlaryńyz bıikteı bersin. Áńgimelesken Gúlzeınep SÁDIRQYZY.