О́tken aptanyń sońynda Kýrchatov qalasynda, naqtylap aıtsaq, osyndaǵy Ulttyq ıadrolyq ortalyqta Atom salasy qyzmetkerleriniń kúni jyldaǵydan da erekshe jaǵdaıda atalyp ótildi. Al onyń sebebi joq emes edi. Bıylǵy jyly Elbasy Jarlyǵymen Semeı atom polıgonynyń jabylǵanyna 20 jyl tolyp otyr. Mine, sodan beride tek Ulttyq ıadrolyq ortalyq qana emes, Kýrchatov qalasy tutasymen beıbit maqsatta jumys isteýde.
Muny bir desek, ekinshiden, ózderiniń kásibı merekesi qarsańynda atalǵan ortalyqtyń bas ǵımaraty sáýletti jańa qonysqa jaıǵasty. Onda atom salasy qyzmetkerleriniń alańsyz jumys isteýine meılinshe qolaıly múmkindik jasalǵan. Onyń syrtynda jańa ǵımarattaǵy akt jáne sport zaldary da búgingi kún talabyna saı tolyq jabdyqtalǵan.
Merekelik jıyndy ortalyqtyń bas dırektory, akademık, Memlekettik syılyqtyń laýreaty Qaırat Kádirjanov asha otyryp, táýelsizdiktiń 20 jylynda atqarylǵan jumystarǵa qysqasha toqtalyp ótti. Odan keıingi jerde atom salasynyń úzdik qyzmetkerleri salalyq mınıstrlik, oblystyq jáne qalalyq ákimdiktiń tıisinshe marapattaryn ıelendi. Mundaǵy ǵalymdar korpýsyn kásibı merekelerimen sondaı-aq ıadrolyq synaqtarǵa qarsy «Nevada-Semeı» halyqaralyq qozǵalysynyń vıse-prezıdenti Sultan Kartoev, Qazaqstan Ulttyq jaratylystaný ǵylymdary akademııasy Semeı óńirindegi fılıalynyń tóraǵasy, professor Serikbaı Maýsymbaev jáne taǵy basqalar qyzý quttyqtady.
Jıyn sońynda ortalyq jarııalaǵan jýrnalıster konkýrsynyń qorytyndysy boıynsha jeńimpaz atanǵan áriptesterimiz marapattaldy. Budan keıin baspasóz máslıhaty ótkizildi.
Dáýlet SEISENULY,
Semeı.